కువైట్: తమ ఉద్యోగులకు సాలరీలు చెల్లించడంలో విఫలమైనందుకు 10,000 ప్రైవేట్ రంగ కంపెనీల ఫైళ్లను కువైట్ నిలిపివేసిందని మొదటి ఉప ప్రధాన మంత్రి మరియు అంతర్గత వ్యవహారాల మంత్రి షేక్ ఫహద్ అల్-యూసెఫ్ ప్రకటించారు.  ప్రభావిత కంపెనీల ఫైళ్లలో ఐదుగురు లేదా అంతకంటే ఎక్కువ మంది కార్మికులు నమోదై ఉన్నారని, వారు ఒక సంవత్సరం నుండి 18 నెలల వరకు జీతాలు చెల్లించడంలో విఫలమయ్యారని అల్-యూసెఫ్ తెలిపారు.

జీతాల చెల్లింపులో జాప్యం తీవ్ర స్థాయికి చేరుకుందని, ఈ ఉల్లంఘనలు సహకార సంఘాలలో పనిచేసే కార్మికులను కూడా ప్రభావితం చేస్తున్నాయని ఆయన చెప్పారు. సకాలంలో వేతనాలు చెల్లించకపోవడం కార్మిక వివాదాలు మరియు నిరసనలకు దోహదపడుతోందని ఆయన హెచ్చరించారు.

కార్మికుల జీతాలు చెల్లించడంలో విఫలమైనందుకు, సెప్టెంబర్ నుండి 10,000 కంపెనీల ఫైళ్లను తమ సంస్థ నిలిపివేసిందని పీఏఎం డైరెక్టర్ రబాబ్ అల్-ఒసైమీ తెలిపారు. యజమానులు తదుపరి నెల ఏడవ తేదీలోగా జీతాలు చెల్లించేలా చూడాలని ఆదేశించారు. కంపెనీ ఫైళ్లను నిలిపివేయడం వల్ల, ఆ కంపెనీల కింద నమోదైన కువైట్ పౌరులకు అందే ఉపాధి సహాయ చెల్లింపులు కూడా నిలిచిపోతాయని అల్-ఒసైమీ తెలిపారు.

కాగా, ఈ సమావేశంలో, కంపెనీ రిజిస్ట్రేషన్ల దుర్వినియోగం మరియు మనీలాండరింగ్ కేసులలో పౌరుల ప్రమేయం ఉండే అవకాశంపై అల్-యూసెఫ్ ఆందోళన వ్యక్తం చేశారు. ఇటువంటి కేసులు పెరుగుతున్నాయని, వీటికి రాష్ట్ర భద్రతా దర్యాప్తు విభాగం దృష్టి సారించాల్సిన అవసరం ఉందని అన్నారు. నిబంధనలను ఉల్లంఘించినందుకు ఇటీవల కాలంలో సుమారు 300 మంది డెలివరీ కార్మికులను దేశం నుండి బహిష్కరించినట్లు ఆయన వెల్లడించారు.