దుబాయ్‌: యూఏఈలో వాతావరణం అస్థిరంగా మారి భారీ వర్షాలు కురిసే అవకాశం ఉన్న నేపథ్యంలో దుబాయ్‌ మున్సిపాలిటీ అప్రమత్తమైంది. వర్షపు నీరు రోడ్లపై నిలిచిపోకుండా, డ్రైనేజీ వ్యవస్థపై ఒత్తిడి తగ్గించేలా ముందస్తు చర్యలు చేపట్టింది. ఇందులో భాగంగా 70,000కు పైగా డ్రైనేజీ ఇన్‌లెట్లను శుభ్రం చేయడంతో పాటు, 10 తాత్కాలిక నీటి సేకరణ సరస్సులను సిద్ధం చేసింది. అత్యవసర పరిస్థితులను ఎదుర్కొనేందుకు 675 మంది సిబ్బంది, 1,100 ప్రత్యేక వాహనాలు, పంపులు, ఇతర యంత్రాలను అందుబాటులో ఉంచినట్లు అధికారులు వెల్లడించారు.

24 గంటల పాటు అందుబాటులో అత్యవసర బృందాలు, ఇంజినీర్లు, పర్యవేక్షకులు, డ్రైవర్లు, క్షేత్రస్థాయి సిబ్బందితో కూడిన 675 మంది ప్రత్యేక బృందం 24 గంటల పాటు అందుబాటులో ఉంటుంది. భారీ వర్షాలు, నీరు నిలిచిపోవడం వంటి అత్యవసర పరిస్థితులపై వచ్చే ఫిర్యాదులకు ప్రాధాన్యత ఆధారంగా స్పందించనుంది. వర్షపు నీటి డ్రైనేజీ వ్యవస్థలకు ముందస్తు నిర్వహణ పనులు చేపట్టడంతో పాటు, మురుగునీటి శుద్ధి కేంద్రాల పనితీరును కూడా అధికారులు పరిశీలించారు. వర్షపాతం తీవ్రత, ప్రభావిత ప్రాంతాలు, ఫిర్యాదుల అత్యవసరతను బట్టి క్షేత్రస్థాయి బృందాలను మోహరించనున్నారు.

నీటి నిల్వ కోసం 10 తాత్కాలిక సరస్సులు

భారీ వర్షాలు కురిసినప్పుడు ప్రవహించే నీటిని సేకరించి, ప్రధాన డ్రైనేజీ వ్యవస్థపై ఒత్తిడిని తగ్గించేందుకు వ్యూహాత్మక ప్రాంతాల్లో 10 తాత్కాలిక నీటి సేకరణ సరస్సులను సిద్ధం చేశారు. అవసరాన్ని బట్టి శుద్ధి కేంద్రాల నుంచి నీటిని ఈ ప్రాంతాలకు మళ్లించేలా ప్రత్యేక ప్రణాళికలు రూపొందించారు. వర్షాకాలానికి ముందే డ్రైనేజీ ఇన్‌లెట్లు, గ్రావిటీ పైప్‌లైన్లను శుభ్రం చేసి, వ్యవస్థలోని వివిధ భాగాలు సక్రమంగా పనిచేస్తున్నాయో లేదో తనిఖీ చేసినట్లు దుబాయ్‌ మున్సిపాలిటీ తెలిపింది. రియల్ ఎస్టేట్ డెవలపర్లు, ఫ్రీజోన్ అధికారులతో కలిసి వారి పరిధిలోని మౌలిక సదుపాయాల సన్నద్ధతను కూడా అంచనా వేస్తోంది.

గత అనుభవాలతో కొత్త ప్రణాళికలు

దుబాయ్‌ మున్సిపాలిటీ వ్యర్థాలు, మురుగునీటి వ్యవహారాల విభాగం సీఈఓ, వర్షపు నీటి డ్రైనేజీ బృందం అధిపతి ఆదిల్ మొహమ్మద్ అల్ మర్జూకీ మాట్లాడుతూ.. నివాసితులు, సందర్శకుల భద్రతే తమ ప్రధాన ప్రాధాన్యమని తెలిపారు. గతంలో వర్షాల సమయంలో నీరు నిలిచిన ప్రాంతాలను గుర్తించి, ఆ అనుభవాల ఆధారంగా అత్యవసర స్పందన ప్రణాళికలను మెరుగుపరిచినట్లు అధికారులు వెల్లడించారు. డ్రైనేజీ వ్యవస్థలను బలోపేతం చేయడంతో పాటు, అవసరమైన ప్రాంతాల్లో సిబ్బంది, యంత్రాలను వేగంగా మోహరించేలా చర్యలు తీసుకున్నారు.

దుబాయ్‌ కమాండ్ అండ్ కంట్రోల్ సెంటర్ వాతావరణ పరిస్థితులు, అత్యవసర ఫిర్యాదులను 24 గంటల పాటు పర్యవేక్షించనుంది. ఈ కేంద్రం దుబాయ్‌ పోలీస్‌, రోడ్స్ అండ్ ట్రాన్స్‌పోర్ట్ అథారిటీ, దుబాయ్‌ సివిల్ డిఫెన్స్‌, దుబాయ్‌ రెసిలియన్స్ సెంటర్‌తో సమన్వయం చేసుకుంటుంది. ఈ చర్యలు దుబాయ్‌ సుప్రీం కమిటీ ఫర్ క్రైసిస్ అండ్ డిజాస్టర్ మేనేజ్‌మెంట్ పర్యవేక్షణలో కొనసాగనున్నాయి. వరద పరిస్థితులను ఎదుర్కొనే సామర్థ్యాన్ని పరీక్షించేందుకు వాతావరణ అనుకరణలు, క్షేత్రస్థాయి శిక్షణ కార్యక్రమాలను కూడా నిర్వహించారు.

దోమల నివారణపై ప్రత్యేక దృష్టి

వర్షాల అనంతరం నిలిచిపోయే నీరు దోమల వృద్ధికి కారణం కాకుండా ఉండేందుకు మున్సిపాలిటీ ప్రత్యేక చర్యలు చేపట్టింది. దోమల ఉనికిని గుర్తించే పర్యవేక్షణను పెంచడంతో పాటు, దోమల ఉచ్చులు, స్ప్రేయింగ్ పరికరాలు, థర్మల్ ఫాగింగ్ యంత్రాలు, నమూనాల పరీక్షా పరికరాలను వినియోగిస్తోంది. నివాసితులు, భవన యజమానులు వర్షపు నీరు వెళ్లే డ్రైనేజీ మార్గాల్లో అడ్డంకులు లేకుండా చూసుకోవాలని అధికారులు సూచించారు. ముఖ్యంగా బేస్‌మెంట్‌లు ఉన్న భవనాల్లో డ్రైనేజీ వ్యవస్థలను తనిఖీ చేయాలని, నీరు తిరిగి భవనాల్లోకి ప్రవేశించకుండా నిరోధించే నాన్‌-రిటర్న్ వాల్వ్‌లు సక్రమంగా పనిచేస్తున్నాయో లేదో నిర్ధారించుకోవాలని కోరారు.

భారీ వర్షాల సమయంలో ప్రజలకు ఇబ్బందులు తగ్గించడంతో పాటు, నగరంలోని రహదారులు, మౌలిక సదుపాయాలను రక్షించేందుకు అన్ని విభాగాలు సమన్వయంతో పనిచేస్తున్నట్లు మున్సిపాలిటీ వెల్లడించింది.వర్షపు నీరు నిలిచిపోవడం లేదా ఇతర అత్యవసర పరిస్థితులపై ఫిర్యాదు చేసేందుకు దుబాయ్‌ మున్సిపాలిటీ కాంటాక్ట్ సెంటర్ 800900, వాట్సాప్ దుబాయ్‌ మున్సిపాలిటీ అధికారిక వాట్సాప్ సేవ కోరాయి.