దోహా: ఖతార్‌లో భారతీయ మహిళా వ్యాపారవేత్తలను ప్రోత్సహించే లక్ష్యంతో ఇండియన్ ఉమెన్స్ అసోసియేషన్ (IWA) ఆధ్వర్యంలో నిర్వహించిన దీపావళి బజార్‌ను భారత రాయబారి డాక్టర్ కె. శ్రీకర్ రెడ్డి ప్రారంభించారు. అక్టోబర్ 22, 2026న ఖతార్‌లోని ఇండియన్ కల్చరల్ సెంటర్ (ICC) ప్రాంగణంలో జరిగిన ఈ కార్యక్రమాన్ని ఆయన సతీమణి, ఐడబ్ల్యూఏ ప్యాట్రన్ ప్రతిమా రెడ్డితో కలిసి ప్రారంభించారు.

ఈ దీపావళి బజార్ ఖతార్‌లో నివసిస్తున్న భారతీయ మహిళా వ్యాపారవేత్తలకు తమ సృజనాత్మకతను ప్రదర్శించేందుకు, ఉత్పత్తులను పరిచయం చేసేందుకు, వ్యాపార అవకాశాలను విస్తరించుకునేందుకు వేదికగా నిలిచింది.

ఐడబ్ల్యూఏ సభ్యులతో పాటు పలువురు భారతీయ మహిళా పారిశ్రామికవేత్తలు ఈ కార్యక్రమంలో ఉత్సాహంగా పాల్గొన్నారు. వివిధ ఉత్పత్తులు, హస్తకళలు, సృజనాత్మక వస్తువుల ప్రదర్శనతో బజార్ సందడిగా మారింది.

దీపావళి పండుగ ఉత్సాహాన్ని ప్రతిబింబించిన ఈ కార్యక్రమం మహిళల పారిశ్రామిక నైపుణ్యాలను ప్రోత్సహించడంతో పాటు ఆర్థిక స్వావలంబన, మహిళా సాధికారత, సామాజిక భాగస్వామ్యం ప్రాధాన్యతను చాటిచెప్పింది.

మహిళా వ్యాపారవేత్తలకు తమ ఉత్పత్తులను విస్తృతంగా పరిచయం చేసుకునేందుకు, వినియోగదారులతో సంబంధాలను పెంపొందించుకునేందుకు ఇలాంటి కార్యక్రమాలు దోహదపడతాయి. పండుగ వేడుకలతో పాటు మహిళల ప్రతిభ, వ్యాపార సామర్థ్యాలను ప్రోత్సహించే వేదికగా ఐడబ్ల్యూఏ దీపావళి బజార్ నిలిచింది.

--రాజ్ కుమార్ వనంబత్తిన(మాగల్ఫ్ ప్రతినిధి ఖతార్)