దుబాయ్: ఏఐ సాయంతో ఆకర్షణీయమైన రెజ్యూమ్‌లు రూపొందించడం, ఇంటర్వ్యూలకు సమర్థంగా సమాధానాలు సిద్ధం చేసుకోవడం సులభమవడంతో యూఏఈలో ఉద్యోగ నియామక సంస్థలకు కొత్త సవాళ్లు ఎదురవుతున్నాయి. అభ్యర్థులు తమ దరఖాస్తుల్లో పేర్కొన్న నైపుణ్యాలు నిజంగా ఉన్నాయా లేదా అన్నది గుర్తించేందుకు రిక్రూటర్లు కొత్త పద్ధతులను అనుసరిస్తున్నారు.

ఓ అమెరికా అధ్యయనం ప్రకారం, ఏఐ వినియోగం పెరుగుతుండటంతో అభ్యర్థుల అసలు సామర్థ్యాలను అంచనా వేయడం కష్టమవుతోందని 60 శాతం మంది రిక్రూటర్స్ అభిప్రాయపడ్డారు. అలాగే, ఏఐ నైపుణ్యాలను సమర్థంగా ఎలా అంచనా వేయాలో ఇంకా నిర్ణయించుకోలేని యజమానుల సంఖ్య 2025లో 16 శాతం ఉండగా, 2026లో 32 శాతానికి పెరిగింది.

ప్రాక్టికల్ పరీక్షలకు ప్రాధాన్యం

రెజ్యూమ్‌లలోని వివరాలకే పరిమితం కాకుండా, అభ్యర్థులకు ప్రాక్టికల్ పరీక్షలు నిర్వహించడం, గతంలో చేసిన పనులకు ఆధారాలు పరిశీలించడం, సమస్యలను ఎలా పరిష్కరిస్తారో తెలుసుకునేందుకు ప్రశ్నలు అడగడంపై కంపెనీలు దృష్టి పెడుతున్నాయి. ముఖ్యంగా సాంకేతిక, ఉన్నత స్థాయి ఉద్యోగాలకు వాస్తవ అనుభవం, నిర్ణయాలు తీసుకునే సామర్థ్యం, సాధించిన ఫలితాలను పరిశీలిస్తున్నాయి.

ఏఐ సాయంతో దరఖాస్తులను మెరుగ్గా రూపొందించవచ్చని, అయితే రెజ్యూమ్ ఒక్కటే అభ్యర్థి సామర్థ్యాన్ని నిర్ధారించలేదని ఓ ఐటీ కంపెనీ ఫౌండర్ పేర్కొన్నారు. ఏఐతో రూపొందించిన దరఖాస్తులు ఒకే తరహాలో కనిపించే అవకాశం ఉండటంతో టెక్నికల్ టెస్టులు, పర్సనల్ ఇంటర్వ్యూలు కీలకమవుతున్నాయని ఓ ప్రముఖ కంపెనీ రిక్రూటర్ తెలిపారు. అభ్యర్థుల విద్యార్హతలు, ఉద్యోగ హోదాలకే ప్రాధాన్యం ఇవ్వకుండా, వారు వాస్తవంగా ఏం సాధించారు, ఎలాంటి సమస్యలను పరిష్కరించారు, సంస్థకు ఎలా సహకరించారు అనే అంశాలను పరిశీలిస్తున్నట్లు పేర్కొన్నారు. 

ఏఐ వినియోగం తప్పు కాదని, అయితే దరఖాస్తులో పేర్కొన్న అనుభవం, నైపుణ్యాలు అభ్యర్థి వాస్తవ సామర్థ్యాలకు సరిపోవాలని నిపుణులు చెబుతున్నారు. డైరెక్ట్ ఇంటర్వ్యూలు, తదుపరి ప్రశ్నలు, నైపుణ్య పరీక్షల ద్వారా అభ్యర్థుల సామర్థ్యాలను అంచనా వేసేందుకు ఏఐ సాధనాలను కూడా ఉపయోగించవచ్చని సూచిస్తున్నారు.

మొత్తంగా, యూఏఈ ఉద్యోగ మార్కెట్‌లో ఆకర్షణీయమైన రెజ్యూమ్ కంటే వాస్తవ నైపుణ్యాలు, అనుభవం, సమస్యలను పరిష్కరించే సామర్థ్యానికే ఎక్కువ ప్రాధాన్యం పెరుగుతోందని రిక్రూటర్స్ అభిప్రాయపడుతున్నారు.