సోమాలియా దేశాధ్యక్షుడి నివాసానికి సమీపంలోనే కారు బాంబు పేలింది. రాజధాని మోగదీషు నగరంలో అధ్యక్షుడి ప్యాలెస్‌ బయట బాంబు పేలడంతో అక్కడి హోటల్స్‌ పాక్షికంగా దెబ్బతిన్నట్లు పోలీసులు వెల్లడించారు. ఈ ఘటనలో ఐదుగురు వ్యక్తులు మరణించారు. దుండగుడు కారులో వచ్చి ఆత్మాహుతి దాడికి పాల్పడినట్లు స్థానిక పోలీసు అధికారి మేజర్‌ మహ్మద్‌ అలీ వెల్లడించారు. అధ్యక్షుడు హసన్‌ షేక్‌ నివాసానికి ఎదురుగా ఉన్న రెండు హోటల్స్‌ దెబ్బతిన్నట్లు ఆయన తెలిపారు. బాంబు పేలిన వెంటనే పెద్ద ఎత్తున పొగలు వ్యాపించాయి. పేలుడు తర్వాత తుపాకీ కాల్పులు కూడా వినిపించినట్లు పోలీసులు వెల్లడించారు.అలాగే హోటల్‌ వద్ద అల్‌షబాబ్‌ గ్రూప్‌ మిలిటెంట్లు ఉన్నట్లు సమాచారం.
ఉగ్రవాద సంస్థ అల్‌ఖైదాకు అనుబంధ గ్రూప్‌ అయిన అల్‌-షబాబ్‌కు చెందిన మిలిటెంట్లు ఇటీవల మోగదీషుపై తరచూ దాడులకు తెగబడుతున్నారు. ఈ నెల ప్రారంభంలో మోగదీషులోని రెస్టారెంట్‌పై జరిగిన దాడిలో 9 మంది మరణించారు. మంగళవారం ఏకంగా అధ్యక్ష నివాసం వద్దే దాడి చేశారు.
పోలీసులు ఈ ఘటనపై విచారణ జరుపుతున్నారు.