మెగా పవర్ స్టార్ రామ్ చరణ్ హీరోగా నటిస్తోన్న 'ధృవ' సినిమాకు సంబంధించి షూటింగ్ అయిపోయింది. ప్రస్తుతం పోస్ట్ ప్రొడక్షన్ పనులు కూడా చివరి దశకు చేరుకున్నాయి. చెర్రీ తన డబ్బింగ్ కూడా పూర్తి చేసినట్లు తెలిపాడు. సినిమాను ఎప్పుడు ప్రేక్షకులతో కలిసి థియేటర్లలో చూస్తానని ఆసక్తిగా ఎదురుచూస్తున్నట్లు తెలిపాడు. నెలరోజుల క్రితమే విడుదలైన టీజర్ సినిమాపై ఉన్న అంచనాలను తారాస్థాయికి తీసుకెళ్తే, ఈమధ్యే విడుదలైన ఆడియో కూడా అందుకు ఏమాత్రం తగ్గకుండా ఆకట్టుకొని దూసుకుపోతోంది. ఇక వచ్చే నెల 2వ తేదీన సినిమాను ప్రేక్షకుల ముందుకు తీసుకురానున్నట్లు ముందే ప్రకటించిన టీమ్, అందుకు తగ్గట్టే అన్ని కార్యక్రమాలనూ వేగవంతం చేసింది.