సీనియర్‌ నటి వాణిశ్రీకి గాడ్‌ఫాదర్‌, రామానాయుడు వంటి సీనియర్‌ నిర్మాతల శ్రేయోభిలాషి ఆర్‌.సత్తిరాజు (82) కన్నుమూశారు. చెన్నైలోని ఆయన స్వగృహంలో సోమవారం రాత్రి గుండెపోటుకి గురై తుదిశ్వాస విడిచారు. ఆయనకు భార్య కాంతమ్మ (వాణిశ్రీ సోదరి), కుమారులు ఆర్‌ఎస్‌ఎన్ మూర్తి, ఆర్‌.మురళీకృష్ణ ఉన్నారు. కుమార్తె చాముండేశ్వరి అనారోగ్యంతో నాలుగేళ్ల క్రితం మరణించారు.సత్తిరాజు స్వస్థలం పశ్చిమ గోదావరి జిల్లాలోని తణుకు. స్వతహాగా చిత్రకారుడైన ఆయన ఆర్ట్‌ టీచర్‌గా చెన్నైకి వచ్చారు. అనంతరం సినీ పరిచయాలు పెరిగాయి. అప్పుడే ఇండస్ర్టీలో నిలదొక్కుకుంటున్న వాణిశ్రీకి అండగా నిలిచి, ఆమె కెరీర్‌ని అత్యున్నత స్థాయికి చేర్చడంలో విశేష కృషి చేశారు.

దివంగత ముఖ్యమంత్రి వెంగళ్‌రావు హయాంలో టీటీడీ బోర్డు సభ్యుడిగా కూడా వ్యవహరించారు. అందరికీ ఆప్తులుగా, అజాత శత్రువుగా మెలిగిన సత్తిరాజు మరణంపై చెన్నైలోని సినీ, తెలుగు ప్రముఖులు తీవ్ర సంతాపం తెలియజేశారు. వాణిశ్రీ అశ్రునయనాలతో తన గాడ్‌ఫాదర్‌కు నివాళులర్పించారు. కాగా, మంగళవారం మధ్యాహ్నం నుంగంబాక్కం శ్మశానవాటికలో అంత్యక్రియలు జరిగాయి.