'గర్ల్‌ఫ్రెండ్‌' చిత్రంలోని 'ప్రేమెంత పనిచేసె నారాయణ' పాట అప్పట్లో కుర్రకారును ఉర్రూత లూగించింది. ఇప్పుడు అదే పేరుతో ఓ చిత్రం తెరకెక్కుతోంది. హరికృష్ణ, అక్షిత జంటగా జె.ఎస్‌.ఆర్‌ మూవీస్‌ పతాకంపై జొన్నలగడ్డ శ్రీనివాసరావు స్వీయ దర్శకత్వంలో నిర్మిస్తున్న ఈ చిత్రం హైదరాబాద్‌లో ప్రారంభమైంది. ముహూర్తపు సన్నివేశానికి ప్రముఖ నిర్మాత ఎమ్మెస్‌ రాజు కెమేరా స్విచాన్‌ చేయగా, హీరో శ్రీకాంత్‌ క్లాప్‌ ఇచ్చారు. దర్శకుడు బి.గోపాల్‌ గౌరవ దర్శకత్వం వహించారు.దర్శక-నిర్మాత మాట్లాడుతూ- ''నాగార్జున, శ్రీకాంత్, జగపతిబాబులతో సినిమా చేసిన నేను కొత్తవాళ్లతో చేయడానికి తొలుత భయపడ్డా.కానీ, శివ చెప్పిన కథ నచ్చడంతో మా అబ్బాయి హరికృష్ణను హీరోగా పరిచయం చేసూ నిర్మిస్తున్నా. ఇదొక ప్రేమకథ. ఓ వాస్తవ సంఘటన స్ఫూర్తితో తెరకెక్కిస్తున్నాం'' అన్నారు. హరికృష్ణ, అక్షిత, నటి జీవితా రాజశేఖర్, దర్శక-నిర్మాత తమ్మారెడ్డి భరద్వాజ, సంగీత దర్శకుడు కోటి, దర్శకుడు కరుణాకరన్‌ తదితరులు ఈ చిత్ర ప్రారంభోత్సవంలో పాల్గొన్నారు