న్యూయార్క్‌/వాషింగ్టన్‌: అమెరికా 45వ అధ్యక్షునిగా పదవీ బాధ్యతలు చేపట్టనున్న డోనాల్డ్‌ ట్రంప్‌ గురువారం న్యూయార్క్‌ నగరం నుంచి వాషింగ్టన్‌కు చేరుకున్నారు. ఆయన వెంట భార్య మెలానియా, కుమార్తె ఇవాంకా, కుమారులు డాన్‌, ఎరిక్‌లు కూడా ఉన్నారు. న్యూయార్క్‌లోని విలాసవంతమైన ట్రంప్‌ టవర్‌ నుంచి విమానాశ్రయం చేరుకున్న వీరు.. తమ ప్రైవేటు విమానంలో కాకుండా అధికారిక లాంఛనాలతో సైనిక జెట్‌ విమానంలో ప్రయాణించారు. అమెరికా కాలమానం ప్రకారం శుక్రవారం మధ్యాహ్నం ట్రంప్‌ అమెరికా అధ్యక్షునిగా ప్రమాణస్వీకారం చేస్తారు.