పాస్‌పోర్ట్‌ డిపార్ట్‌మెంట్‌, ఎస్కార్టుల ప్రయాణంపై ఖచ్చితమైన మార్గదర్శకాలు జారీ చేసింది. పాస్‌పోర్ట్‌ హోల్డర్‌ లేకుండా, ఎస్కార్ట్‌లు ప్రయాణం చేయడానికి వీల్లేదని తెలిపింది. సౌదీ పాస్‌పోర్టులపై ఎస్కార్ట్స్‌ని అదనంగా చేర్చడం కుదరదని పేర్కొంది పాస్‌పోర్ట్‌ డిపార్ట్‌మెంట్‌. ఈ విషయాన్ని పాస్‌పోర్ట్‌ డిపార్ట్‌మెంట్‌ అధికార ప్రతినిథి కల్నల్‌ మొహమ్మద్‌ బిన్‌ అబ్దుల్‌ అజీజ్‌ అల్‌ సాద్‌ స్పష్టం చేశారు. ప్రతి ఒక్కరికీ పాస్‌పోర్ట్‌ ఉండాల్సిందేననీ, ఒకే పాస్‌పోర్ట్‌పై పలువురు వ్యక్తులు ప్రయాణాలు చేయడం వల్ల ఇబ్బందులు తలెత్తుతాయని ఆయన పేర్కొన్నారు. అనుకోని పరిస్థితుల్లో ఓ వ్యక్తి పాస్‌పోర్ట్‌ పోయినట్లయితే ఆ వ్యక్తితోపాటు ఎస్కార్ట్‌గా వెళ్ళినవారికీ సమస్య వస్తుందని, కాబట్టి విధిగా ఎస్కార్ట్‌లకూ పాస్‌పోర్ట్‌ ఉండాల్సిందేనని చెప్పారాయన. విదేశీ ప్రయాణాలకు సంబంధించి పౌరుల్లో అవగాహన కల్పించేందుకు పలు కార్యక్రమాలు చేపడుతున్నట్లు తెలిపారాయన.