భారతదేశ మూలాలున్న వ్యక్తి.. ఐర్లాండ్‌ ప్రధాని పీఠం అధిష్ఠించేందుకు రంగం సిద్ధమవుతోంది. ప్రధాని పదవి రేసులో భారత సంతతి వైద్యుడు లియో వారద్కర్‌ దూసుకుపోతున్నారు. ఐర్లాండ్‌ పార్లమెంటు సభ్యులు, కేబినెట్‌లోని సీనియర్‌ సభ్యుల్లో చాలా మంది ఆయనకు బహిరంగంగానే మద్దతు పలుకుతున్నారు. జూన్‌ 2 లోగా ప్రధాని పదవికి ఎన్నిక జరగనుంది. పార్లమెంటు సభ్యులు ఈ ఓటింగ్‌లో పాల్గొంటారు. వారద్కర్‌కు పోటీగా గృహకల్పన మంత్రి సిమోన్‌ కావనీ బరిలో ఉన్నారు. 38 ఏళ్ల వారద్కర్‌.. ప్రస్తుతం సామాజిక భద్రత శాఖ మంత్రిగా సేవలందిస్తున్నారు. 2007లో తొలిసారి పార్లమెంటు సీటు దక్కించుకున్న ఆయన.. ఫైన్‌ గేల్‌ పార్టీలో వేగంగా ఉన్నత స్థాయికి చేరుకున్నారు. ప్రభుత్వంలోనూ వివిధ మంత్రిత్వశాఖల బాధ్యతలు చేపట్టిన అనుభవం ఆయనకు ఉంది. ఐర్లాండ్‌లో స్వలింగ వివాహాలను చట్టబద్ధం చేయాలని గళమెత్తిన ప్రముఖుల్లో వారద్కర్‌ కూడా ఒకరు. 2015లో స్వలింగ వివాహాలను చట్టబద్ధం చేసిన తొలి దేశంగా ఐర్లాండ్‌ అవతరించింది.

తాను స్వలింగ సంపర్కుడినన్న విషయాన్ని వారద్కర్‌ కూడా బహిరంగపరిచారు. ప్రధాని పీఠం దక్కితే.. దేశంలో ఈ పదవి చేపట్టిన తొలి స్వలింగ సంపర్కుడిగా చరిత్రకెక్కనున్నారు. వారద్కర్‌ తండ్రి అశోక్‌ వారద్కర్‌ ముంబయిలో జన్మించారు.