'తంగరథం'తో తమిళ సినిమాలో ఎంట్రీ
16న తెరపైకి
1980, 90ల్లో దక్షిణాదిని ఓ ఊపు ఊపిన శృంగారతారల్లో డిస్కో శాంతి ఒకరు. తెరపై ఆమె కనిపిస్తే చాలు థియేటర్లు మారుమ్రోగిపోయేవి. అయితే డిస్కోశాంతి కొన్నేళ్లుగా సినిమాలు తగ్గించేసి కుటుంబ బాధ్యతలు నిర్వర్తిస్తున్నారు. ఈ నేపథ్యంలో సినిమాల్లో ఆమె లేని లోటును భర్తీ చేసేందుకు ఆమె చెల్లెలు సుచిత్ర త్వరలోనే తమిళ ప్రేక్షకుల ముందుకు రాబోతున్నారు. వచ్చే 16న విడుదల కాబోతున్న 'తంగరథం' చిత్రంలో సుచిత్ర ఐటమ్‌గర్ల్‌గా నటించింది. మొట్టైరాజేంద్రన్‌తో కలిసి ఆమె చేసిన ఐటమ్‌సాంగ్‌ ఈ సినిమాలోని హైలెట్స్‌లో ఒకటిగా నిలుస్తుందని చెప్పారు చిత్ర దర్శకుడు బాలమురుగన్‌. ఎన్‌టీసీ మీడియా, వీకేర్‌ ప్రొడక్షన్‌ బ్యానర్లపై సంయుక్తంగా నిర్మిస్తున్న 'తంగరథం'లో వర్ధమానతారలు వెట్రి, అతిదికృష్ణన్‌ హీరోహీరోయిన్లుగా నటించారు. మదురై, కోవైల మధ్య ఉన్న ఓట్టాన్‌సత్రం మార్కెట్‌ బ్యాక్‌డ్రాప్‌లో అందమైన గ్రామీణ ప్రేమకథాచిత్రంగా తంగరథం' తెరకెక్కింది. ఓట్టాన్‌సత్రం మార్కెట్‌లో లైవ్‌గా చిత్రీకరణ జరిపారు. ఆ మార్కెట్‌పై ఆధారపడి జీవిస్తున్న కుటుంబాల్లో దర్శకుడు బాలమురుగన్‌ కుటుంబమూ ఒకటి.