షారుక్‌ ఖాన్‌, అనుష్క శర్మ ముచ్చటగా మూడోసారి జంటగా కన్పించబోతున్నారు. ఈ సినిమాకి ‘రెహనుమా’, ‘ది రింగ్‌’ అనే టైటిల్స్‌ అనుకున్నారు. కానీ వెరైటీగా ‘జబ్‌ హ్యారీ మెట్‌ సెజల్‌’ అనే టైటిల్‌ను ఖరారు చేశారు.
ఇంతియాజ్‌ అలీ దర్శకత్వంలో వస్తున్న ఈ చిత్రంలో షారుక్‌ హ్యారీ పాత్రలో, అనుష్క సెజల్‌ పాత్రల్లో నటిస్తున్నారు. షారుక్‌, అనుష్క కాంబినేషన్‌ కంటే ఈ సినిమాకు ఏం టైటిల్‌ పెట్టబోతున్నారన్న దానిపైనే ఇన్నాళ్లూ బాలీవుడ్‌లో చర్చ జరిగింది.
1989లో వచ్చిన ‘వెన్‌ హ్యారీ మెట్‌ సాలీ’ అనే హాలీవుడ్‌ సినిమాలాగే ఈ సినిమానీ తెరకెక్కిస్తున్నారు. అదీకాకుండా ఇంతియాజ్‌ అలీ తీసే సినిమా టైటిల్స్‌లో ‘జబ్‌’ అనే పదం ఎక్కువగా ఉంటుంది. జబ్‌ అంటే అప్పుడు అని అర్థం. 2007లో షాహిద్‌ కపూర్‌, కరీనా కపూర్‌ నటించిన ‘జబ్‌ వి మెట్‌’ చిత్రాన్ని కూడా ఇంతియాజే తెరకెక్కించారు.
ఆ సినిమా అప్పట్లో బ్లాక్‌ బస్టర్‌గా నిలిచింది. అందుకే షారుక్‌ సినిమాకి కూడా జబ్‌ అనే పదం వచ్చేలా టైటిల్‌ ఖరారు చేసినట్లు తెలుస్తోంది. ఇలాంటి టైటిల్‌తో వచ్చిన సినిమాలో షారుక్‌ నటించడం కూడా ఇదే తొలిసారే. ఆగస్ట్‌లో ‘జబ్‌ హ్యారీ మెట్‌ సెజల్‌’ సినిమా ప్రేక్షకుల ముందుకు రానుంది.