స్పాన్సర్‌ తన పాస్‌పోర్ట్‌ని తీసుకోవడంతో తన భవిష్యత్‌ అంధకారంగా మారిందంటూ ఓ మహిళ న్యాయస్థానాన్ని ఆశ్రయించింది. అయితే ఈ కేసు విచారణ నవంబర్‌కి వాయిదా పడింది. ఒకవేళ తీర్పు త్వరగా కావాలనుకుంటే ఆమె అత్యవసర న్యాయస్థానాన్ని ఆశ్రయించవచ్చునని ఎల్‌ఎంఆర్‌ఎ వర్గాలు వెల్లడించాయి. తనకు ఎలాంటి సమాచారం ఇవ్వకుండా తన యజమాని తన వీసాని రద్దు చేశారని బాధితురాలు ఆరోపించారు. ట్రాన్స్‌పోర్ట్‌ ఆఫ్‌షోర్‌ రిక్లమేషన్‌ కాంట్రాక్ట్స్‌ సంస్థలో స్టాఫ్‌ క్లీనర్‌గానూ, కేటరర్‌ అసిస్టెంట్‌గానూ ఆమె పనిచేస్తున్నారు. ఫిలిప్పీన్స్‌కి చెందిన జెన్నీ తనకు ఎదురైన సమస్య గురించి చెబుతూ, అత్యవసర న్యాయస్థానాన్ని ఆశ్రయించడానికి తన వద్ద తగిన ఆర్థిక వనరులు లేవని చెప్పారు. ఈ కారణంగా నవంబర్‌ వరకు తీర్పు కోసం ఎదురుచూస్తానన్నారు. ఫిలిప్పీన్‌ ఎంబసీ అధికారులు, బాధితురాలికి అన్ని విధాలా సహాయ సహకారాలు అందించేందుకు ప్రయత్నిస్తున్నట్లు చెప్పారు. పాస్‌పోర్ట్‌ తనవద్దనే ఉంచుకున్న యజమాని సయెద్‌ సలెహ్‌ మొహ్‌సెన్‌ ఈ వివాదంపై స్పందించడానికి నిరాకరించారు.