తెలుగు రాష్ట్రాల రాజధాని హైదరాబాద్‌ సహా దేశవ్యాప్తంగా భారీ పేలుళ్లకు కుట్రపన్నిన ఐఎస్‌ ఉగ్రవాదిని హైదరాబాద్‌ ప్రత్యేక దర్యాప్తు బృందం (సిట్‌) పోలీసులు శుక్రవారం అరెస్ట్‌ చేశారు. అతడిపేరు కొనకళ్ల సుబ్రమణ్యం అలియాస్‌ ఒమర్‌ (22). కృష్ణా జిల్లా చల్లపల్లి మండలానికి చెందిన సుబ్రమణ్యం ఇస్లాంవైపు ఆకర్షితుడై 2014లో మతం మార్చుకున్నాడు. శ్రీనగర్‌, ఉమ్రాబాద్‌, తమిళనాడులోని అంబుర్‌, ముంబై తదితర ప్రాంతాలు తిరుగుతూ మతపరమైన కార్యక్రమాల్లో చురుగ్గా పాల్గొన్నాడు. ఈ క్రమంలో అతడికి ఐఎస్‌ మాడ్యూల్స్‌తో పరిచయమైంది. ముంబైఐఎస్‌ మాడ్యూల్‌కు చెందిన అబు కుఫ్హా ఆల్‌-హిందీతో టెలిగ్రామ్‌ద్వారా తరచూ సంభాషిస్తూ దేశంలో మారణహోమం సృష్టించేందుకు సిద్ధమయ్యాడు. ఐఎస్‌ మాడ్యూళ్లపై నిఘా పెట్టిన పోలీసులకు సుబ్రమణ్యం వివరాలు కూడా తెలిశాయి. వారు అతడిపై నిఘాను కొనసాగించారు. అతడు విధ్వంస కార్యకలాపాల్లో పాల్గొనేందుకు సన్నద్ధమవుతున్నట్లు గుర్తించి అరెస్టు చేసేందుకు సిద్ధమయ్యారు.

మరోవైపు..హైదరాబాద్‌ సహా దేశవ్యాప్తంగా పలు నగరాల్లో పేలుళ్లకు కుట్రపన్నిన ఒమర్‌ వారంరోజుల క్రితం రాజధానికి చేరాడు. టోలిచౌకిలోని సోఫియా రెసిడెన్సీ మూడో అంతస్తు రూమ్‌ నెంబరు 302లో అమర్‌ అనే అంగవికలుడి వద్ద వంటమనిషిగా చేరాడు. రెండు రోజుల క్రితం ఇల్లు వదిలి వెళ్లిన ఒమర్‌ తిరిగి రాకపోవటంతో ఆ ఇంటి యజమాని పోలీసులకు ఫిర్యాదు చేసేందుకు సిద్ధమయ్యాడు. అంతలోనే..

సిట్‌ ఏసీపీ డి.హరికుమార్‌ యాదవ్‌,ఇన్‌స్పెక్టర్‌ కె.శ్యామలరావు శుక్రవారం ఉదయం 8 గంటలకు ఒమర్‌ను అరెస్ట్‌ చేసి..రిమాండ్‌కు తరలించారు. శిక్షణ కోసం దేశం దాటి వెళ్లేందుకు సిద్ధమవుతున్న సమయంలోనే ఒమర్‌ను అరెస్ట్‌ చేసినట్లు సమాచారం. కాగా.. ఒక హిందువు మతం మార్చుకుని దేశవ్యాప్తంగా పేలుళ్లకు కుట్రపన్ని, అరెస్టు కావడం సంచలనం సృష్టించింది.