కళ్లు తిరిగే రేటు అని మాట వరుసకు వింటుంటాం. కానీ చైనాలో ఓ మహిళ నిజంగానే బ్రేస్‌లెట్‌ ధర విని కళ్లు తేలేసింది. ఎరక్కపోయి బ్రేస్‌లెట్‌ను చేతికి పెట్టుకున్న పాపానికి ఇప్పుడు జీవితాంతం బాధ పడాల్సిన పరిస్థితిని కొనితెచ్చుకుంది. 

యునాన్ ప్రావిన్స్‌లోని రూయిలి నగరంలో షాపింగ్‌కు వెళ్లింది సోఫీ అనే మహిళ. అక్కడ జేడ్‌ బ్రాండ్‌కి చెందిన ఓ బ్రేస్‌లెట్‌ సోఫీకి ఎంతో నచ్చింది. అది తన చేతికి ఎలా ఉంటుందో చూద్దామనుకునేలోపు.. అది కాస్తా కిందపడి పగిలిపోయింది. 

దాని ధరను విచారించగా.. సుమారు 28 లక్షలని షాపు యజమాని తెలిపాడు. అది వినగానే సోఫీ షాప్‌లోనే స్పృహతప్పి పడిపోయింది. దాంతో అక్కడున్నవారంతా ఆమెకు దగ్గరుండి సపర్యలు చేశారు. కొన్ని గంటల వరకు ఆమె స్పృహలోకి రాలేదు. విషయం తెలిసి సోఫీ కుటుంబసభ్యులు షాపుకు వచ్చి.. యజమానికి 6 లక్షలు ఇచ్చారు. కానీ డబ్బు మొత్తం కట్టాల్సిందేనని యజమాని గొడవకు దిగాడు. ఇక చేసేదేంలేక.. వాయిదాల్లో డబ్బు చెల్లించడానికి ఒప్పుకోవడంతో యజమాని శాంతించాడు. మొత్తమ్మీద పొరబాటున బ్రేస్‌లెట్‌ను చేతికి పెట్టుకున్న పాపానికి సోఫీ ఇప్పుడు జీవితాంతం చింతించాల్సిన పరిస్థితి ఏర్పడింది.