వరుస విజయాల్ని సొంతం చేసుకొంటున్న కథానాయకుల్లో నిఖిల్‌ ఒకరు. కథల ఎంపికలో తీసుకొంటున్న జాగ్రత్తలే ఆయనకి విజయాల్ని తెచ్చిపెడుతున్నాయి. 'ఎక్కడికి పోతావు చిన్నవాడా?', 'కేశవ' చిత్రాలతో బాక్సాఫీసు మరోసారి థ్రిల్‌ చేశారాయన. త్వరలోనే ఓ రీమేక్‌ చిత్రంలో నటించేందుకు రంగం సిద్ధం చేసుకొన్నట్టు సమాచారం. తమిళంలో అథర్వ కథానాయకుడిగా 'కణిదన్‌' పేరుతో ఓ చిత్రం తెరకెక్కింది. నకిలీ సర్టిఫికెట్లపై ఓ యువ జర్నలిస్టు చేసే పోరాటం నేపథ్యంలో ఆ చిత్రం సాగుతుంది. అన్ని వర్గాల్ని మెప్పించి విజయం సొంతం చేసుకొన్న ఆ చిత్రంపై తెలుగు పరిశ్రమ దృష్టి పడింది. దాంతో విడుదలైన వెంటనే రీమేక్‌ హక్కుల్ని ఠాగూర్‌ మధు, నల్లమలుపు బుజ్జి సొంతం చేసుకొన్నారు. ఆ చిత్రంలో రవితేజ నటిస్తారని ప్రచారం సాగింది. అయితే ఇప్పుడు రవితేజ కాకుండా, జూనియర్‌ రవితేజగా గుర్తింపు పొందిన నిఖిల్‌ అందులో నటించబోతున్నట్టు సమాచారం. తమిళంలో చిత్రాన్ని తెరకెక్కించిన టి.ఎన్‌.సంతోష్‌ తెలుగులోనూ దర్శకత్వం వహిస్తారని తెలిసింది. నిఖిల్‌ కూడా యువ జర్నలిస్టుగా సందడి చేయబోతున్నాడన్నమాట.