పారిస్‌ వాతావరణ ఒప్పందం నుంచి వైదొలిగిన అంశంపై అమెరికా అధ్యక్షుడు డొనాల్డ్‌ ట్రంప్‌ తన నిర్ణయాన్ని వెనక్కి తీసుకునే అవకాశం ఉందని ఫ్రాన్స్‌ అధ్యక్షుడు ఎమ్మానుయేల్‌ మేక్రాన్‌ అన్నారు. ఆదివారం ఆయన జేడీడీ అనే ఓ ప్రతికతో మాట్లాడుతూ.. పారిస్‌ ఒప్పందం విషయంలో ట్రంప్‌ తన వైఖరి మార్చుకునే అవకాశాలు ఉన్నట్లు చెప్పారు. దీనికి సంబంధించి మరికొన్ని నెలల్లో ఒక పరిష్కారాన్ని ఆలోచించి చెబుతానని ట్రంప్‌ చెప్పినట్లు మేక్రాన్‌ తెలిపారు. ఇటీవల ట్రంప్‌ ఫ్రాన్స్‌ పర్యటనకు వెళ్లిన విషయం తెలిసిందే. ఆ సమయంలోనే ఇరు దేశాధ్యక్షుల మధ్య పారిస్‌ వాతావరణ ఒప్పందం గురించి చర్చలు జరిగాయి. పారిస్‌ వాతావరణ ఒప్పందంలోకి మళ్లీ వచ్చే విధంగా అన్ని సవివరంగా మాట్లాడానని మేక్రాన్‌ చెప్పారు.
పారిస్‌ వాతావరణ ఒప్పందం నుంచి అమెరికా వైదొలుగుతున్నట్లు ఆ దేశ అధ్యక్షుడు డొనాల్డ్‌ ట్రంప్‌ జూన్‌ నెల మొదటిలో ప్రకటించారు. 'ఇది అమెరికా ఆర్థిక వ్యవస్థకు నష్టదాయకమే కాదు. ఉద్యోగ కల్పననూ దెబ్బతీస్తుంది. భారత్‌, చైనా లాంటి దేశాలకు ఈ ఒప్పందం అనుకూలంగా ఉంది' అంటూ ట్రంప్‌ అప్పట్లో ప్రకటించారు. ఆయన తీసుకున్న నిర్ణయాన్ని పలు దేశాధినేతలు తప్పుబట్టారు. ప్రపంచంలోనే అత్యధిక కాలుష్యానికి కారణమవుతున్న దేశాల్లో అమెరికాది రెండో స్థానం. ఈ ఒప్పందాన్ని అమలు చేయడానికి 190 దేశాలకు పైగా అంగీకరించాయి.