కొరటాల శివ దర్శకత్వంలో వచ్చిన 'శ్రీమంతుడు' సినిమాలో ఓ మంచి డైలాగ్ ఉంది.  'ఊరి నుండి చాలా తీసుకున్నారు.. తిరిగి ఇచ్చేయ్యాలి.. లేకపోతే లావయిపోతారు..' నిజంగా మనం పుట్టి పెరిగిన ఊరికి ఎంతో కొంత చెయ్యాలనుకోవడం చాలా మంచి విషయం.  ఇదే బాటలో పయనిస్తున్నాడు టాలీవుడ్ సూపర్ స్టార్ మహేష్ బాబు.  ఈ క్రమంలోనే తన సొంతూరు ఆంధ్రప్రదేశ్‌లోని బుర్రెపాలెం గ్రామాన్ని దత్తత తీసుకున్నాడు, అలాగే తెలంగాణాలోని సిద్ధాపూర్ గ్రామాన్ని కూడా దత్తత తీసుకుని పలు అభివృద్ధి కార్యక్రమాలు చేపడుతున్నాడు.  అయితే ఇప్పుడు మరో అడుగు ముందుకు వేసి ఏపీ రాజధాని అమరావతిలో ప్రతిభగల పేద విద్యార్థుల కోసం అన్ని సౌకర్యాలతో ఓ మంచి స్కూల్‌ని ఏర్పాటు చేయడానికి సన్నాహాలు చేస్తున్నాడట.  దీనికి సంబంధించిన ప్రచార బాధ్యతలన్నీకూడా తనే స్వయంగా చూసుకుంటాడట.