తెలుగు సినీ నటుడు అల్లు అర్జున్‌ శుక్రవారం హంపీలో సందడిచేశారు. ఉదయం కుటుంబ సభ్యులతో సహా హంపీ చేరుకున్న ఆయన తొలుత విరూపాక్షేశ్వరుడిని దర్శించుకున్నారు. ఆలయ అధికారులు ప్రత్యేక దర్శనానికి అవకాశం కల్పించారు. అనంతరం అక్కడి నుంచి బయల్దేరిన అల్లు కుటుంబం కమల్‌మహల్‌, రాతిరథం, విజయవిఠల ఆలయాలను సందర్శించారు. వారు వెళ్లిన ప్రతిచోట అభిమానులు పెద్ద ఎత్తున చుట్టుముట్టారు. కొందరు చిత్రాలు తీసుకున్నారు. అభిమానులు భారీగా గుమికూడడంతో మధ్యలోనే స్మారకాల సందర్శన రద్దు చేసుకుని హొసపేటెలోని ఓ హోటల్‌కు వచ్చి బస చేశారు. శనివారం మరికొన్ని స్మారకాలను చూసే అవకాశం ఉందని హంపీ పోలీసులు వెల్లడించారు.