రాజకీయాలపై మనసువిప్పి మాట్లాడాడు నటుడు కమల్‌హాసన్. త్వరలో సొంతపార్టీని పెట్టి రాజకీయాల్లోకి వస్తున్నట్లు క్లారిటీ ఇచ్చేశాడు. తాను ఇష్టపడి రాజకీయాల్లోకి రావడంలేదని, ప్రజలు రావాలని బలవంతపెడుతున్నారని, అందువల్లే పార్టీ పెడుతున్నట్టు చెప్పాడు. ఓ ఛానెల్‌కి ఇచ్చిన ఇంటర్వ్యూలో ఈ విషయాలను బయటపెట్టాడు. సెప్టెంబర్ చివరినాటి పార్టీ జెండా, విధివిధానాలు ఖరారు కానున్నాయి.
తను మనసు పూర్వకంగా ఈ నిర్ణయం తీసుకోలేదని, తన ఆలోచనలో సరిపోయే రాజకీయ పార్టీలు తమిళనాడులో లేవని, అందుకే కొత్త పార్టీ వైపు అడుగులు వేస్తున్నానన్నాడు. ఇటు శశికళను అన్నాడీఎంకే నుంచి తప్పించడాన్ని స్వాగతించిన ఆయన, తమిళ రాజకీయాల్లో మార్పు వస్తోందనడానికి ఇదో సాక్ష్యమన్నాడు. అలాగే బీజేపీతో తాను సంబంధం పెట్టుకోనని మరోసారి కుండబద్దలు కొట్టేశాడు.