ఎయిర్ ఫోర్స్‌కు చెందిన హెలికాప్టర్ రాష్ట్రంలోని తవాంగ్ దగ్గర కూలిపోయింది. ఈ ఘటనలో ఐదుగురు మిలిటరీ అధికారులు, ఇద్దరు ఆర్మీ జవాన్లు మరణించారు. మరో అధికారికి గాయాలయ్యాయి. వెంటనే రంగంలోకి దిగిన రెస్యూ టీం గాయపడిన అధికారిని వెంటనే చికిత్స నిమిత్తం ఆసుపత్రికి తరలించారు. ఉదయం 6 గంటలకు ఈఘటన జరిగింది. ఎమ్‌ఐ17 వీ5 హెలికాప్టర్ మంటలు చెలరేగి కుప్పకూలిపోయినట్లు ఆర్మీ ప్రకటించింది. 17000 ఎత్తులో హెలికాప్టర్ ఉన్న సమయంలో ఈ ప్రమాదం జరిగింది. తవాంగ్ నుంచి 130 కిలోమీటర్ల దూరంలో, చైనా బార్డర్‌కు దగ్గర్లోని ప్రాంతం యాంగ్చీలో హెలికాప్టర్ కూలిపోయింది. ఎక్కువ ఎత్తులోనూ ప్రయాణించే, ఎక్కువ బరువును మోయగల సామర్థ్యం ఉండే పవర్‌పుల్ ఇంజన్ ఈ హెలికాప్టర్ ప్రత్యేకత. ఈ హెలికాప్టర్ పలు రెస్క్యూ, రిలీఫ్ ఆపరేషన్లలో చురుగ్గా పాల్గొన్నది. ఐఏఎఫ్.. ఎయిర్ ఫోర్స్ డే జరుపుకున్న ఒకరోజు తర్వాత ఈ ప్రమాదం జరగడం.. అది కూడా వివాదస్పద చైనా బార్డర్‌లో హెలికాప్టర్ కూలడంతో వెంటనే ప్రమాద ఘటన విచారణకు ఆర్మీ ఆదేశించింది.

గత వారం ఐఏఎఫ్‌కు చెందిన ఎయిర్‌క్రాఫ్ట్ హైదరాబాద్‌లోని కీసరలో కూలిపోయిన సంగతి తెలిసిందే.