డొనాల్డ్‌ ట్రంప్‌ అమెరికా అధ్యక్షుడిగా బాధ్యతలు చేపట్టిన తర్వాత వీసా విధానంపై సంచలన నిర్ణయాలు తీసుకున్న విషయం తెలిసిందే. ఇందులో భాగంగానే అమెరికన్లకు ఉద్యోగ అవకాశాలు పెంచేందుకు హెచ్‌-1బీ ఉద్యోగ వీసాల జారీల్లో కఠిన నిబంధనలు తీసుకొస్తామని ట్రంప్‌ అప్పట్లో ప్రకటించారు. అయితే ప్రస్తుతం అలాంటి చర్యలేం చేపట్టట్లేదని తాజాగా అమెరికా మంత్రి ఒకరు చెప్పారు.

హెచ్‌-1బీ వీసా జారీ విధానం మార్పుల కోసం ప్రస్తుతం ఎలాంటి చట్టం తీసుకురావట్లేదని దక్షిణాసియాకు అమెరికా డిప్యూటీ అసిస్టెంట్‌ స్టేట్‌ సెక్రటరీ థామస్‌ వాజ్దా అన్నారు. 'హెచ్‌-1బీ వీసా జారీ విధానంలో మార్పుల కోసం అమెరికాలో ఎలాంటి చట్టం తీసుకురాలేదు. ఈ వీసాల జారీపై సమీక్ష జరపాలని అధ్యక్షుడు డొనాల్డ్‌ ట్రంప్‌ ఆదేశించారు. అయితే దాని తర్వాత ఎలాంటి చర్యలు చేపట్టలేదు. ఈ విధానాన్ని మార్చాలంటే చట్టంలో అనేక మార్పులు తీసుకురావాలి.

ప్రస్తుతానికైతే గతంలో ఉన్నట్లుగానే వీసాలు జారీ చేస్తున్నారు' అని థామస్‌ అన్నారు. కోల్‌కతాలో జరిగిన బెంగాల్‌ ఛాంబర్‌ ఆఫ్‌ కామర్స్‌ అండ్‌ ఇండస్ట్రీ సమావేశానికి హాజరైన థామస్‌.. విలేకరులతో మాట్లాడుతూ ఈ వ్యాఖ్యలు చేశారు. ఇదిలా ఉండగా.. అమెరికాలో శాశ్వత నివాసం పొందేందుకు ఇచ్చే గ్రీన్‌ కార్డు జారీల్లోనూ మార్పులు చేస్తున్నట్లు ట్రంప్‌ ప్రభుత్వం పేర్కొన్న విషయం తెలిసిందే. లాటరీ విధానంలో కాకుండా ప్రతిభ ఆధారంగా గ్రీన్‌ కార్డులు ఇచ్చేందుకు అక్కడి ప్రభుత్వం యోచిస్తోంది.