హైదరాబాద్‌: దక్షిణాదిలో అగ్ర కథానాయికగా రాణిస్తున్న బ్యూటీ సమంత. ఈ భామ ఇంత వరకు మహిళా ప్రాధాన్యం ఉన్న సినిమాల్లో నటించలేదు. అయితే ఆమె తొలిసారి అలాంటి సినిమాకు సంతకం చేసినట్లు సమాచారం. కన్నడ మిస్టరీ యుటర్న్‌లో నటించేందుకు సమంత సిద్ధమైనట్లు తెలుస్తోంది. తెలుగు, తమిళ భాషల్లో ఈ సినిమాను రూపొందించడానికి సన్నాహాలు చేస్తున్నారట. మాతృకకు దర్శకత్వం వహించిన పవన్‌కుమార్‌ ఈ రీమేక్‌ను కూడా తెరకెక్కించనున్నారట. ఈ వార్తలే నిజమైతే ఆయన టాలీవుడ్‌, కోలీవుడ్‌లో తీస్తున్న తొలి సినిమా ఇదే అవుతుంది. 

సమంత యుటర్న్‌ ప్రివ్యూ కట్‌ చూడటానికి తన భర్త నాగచైతన్యతో కలిసి ఇటీవల బెంగళూరు వెళ్లారట. అప్పుడే దర్శకుడితో రీమేక్‌ గురించి మాట్లాడినట్లు తెలుస్తోంది. ఇందులో సమంత జర్నలిస్టు పాత్రలో కనిపించనున్నారట. మాతృకలో శ్రద్ధా శ్రీనాథ్‌, రోగర్‌ నారాయణ్‌, దిలీప్‌ రాజ్‌, రాధికా చేతన్‌ ప్రధాన పాత్రలు పోషించారు. 2016లో ఈ సినిమా విడుదలైంది.