మనామా: స్మోకింగ్‌ అనే దురలవాటుని తగ్గించే క్రమంలో సిగరెట్‌ ఉత్పత్తులపై గణనీయంగా ట్యాక్స్‌ని పెంచడంతో ఆ ప్రయోగం కొంతమేర సత్ఫలితాలను ఇచ్చినట్లే కనిపిస్తోంది. ఎక్సయిజ్‌ ట్యాక్స్‌ అమలుతో సిగరెట్స్‌ కొనేవారి సంఖ్య తగ్గిందని వ్యాపారులు అంటున్నారు. అలాగే కార్బొనేటెడ్‌ డ్రింక్స్‌పైనా ఎక్సయిజ్‌ పన్ను తీవ్ర ప్రభావమే చూపుతోంది. ట్యాక్స్‌ పెరగడంతో తాను స్మోకింగ్‌ని మానేసుకోవాల్సి వచ్చిందనీ, అంత పెద్ద మొత్తంలో తాను సిగరెట్‌ కోసం ఖర్చు చేయలేనని బంగ్లాదేశీ జాతీయుడు మొహమ్మద్‌ ఇస్లామ్‌ చెబుతూ, ఈ నిర్ణయం మంచిదేనని తెలిపారు. తక్కువ జీతంతో పనిచేస్తూ, స్మోకింగ్‌ కోసం అదనంగా ఖర్చు చేయాల్సి రావడం కష్టంగా ఉందని, అందుకే స్మోకింగ్‌ మానేస్తున్నట్లు ఇంకొకరు చెప్పారు. అయితే కొందరు మాత్రం సిగరెట్‌ స్మోకింగ్‌ వ్యసనాన్ని క్రమక్రమంగా తగ్గించుకోవడానికి ప్రయత్నిస్తున్నారు. రోజూ 2 నుంచి 3 ప్యాకెట్ల సిగరెట్లను కాల్చేవారు ఇప్పుడు ఒక్క ప్యాకెట్‌కే పరిమితమవ్వాల్సి వస్తోంది.