హైదరాబాద్‌: ప్రముఖ సినీ నిర్మాత దగ్గుబాటి సురేశ్ బాబు చిన్న కుమారుడు అభిరామ్ పై సినీనటి శ్రీరెడ్డి ఆరోపణలు చేస్తూ ఓ ఫొటోను విడుదల చేసిన విషయం తెలిసిందే. ఆ ఫొటో సోషల్ మీడియాలో వైరల్ కావడమే కాకుండా, కొన్ని టీవీ ఛానెళ్లలోనూ పదే పదే చూపించారు. ఈ విషయంపై మూవీ ఆర్టిస్ట్ అసోసియేషన్ అధ్యక్షుడు శివాజీ రాజా స్పందించారు. టాలీవుడ్ ప్రముఖులపై ఆరోపణలు చేసిన శ్రీరెడ్డిపై విధించిన నిషేధాన్ని ఎత్తివేస్తున్నట్లు ప్రకటించిన అనంతరం శివాజీ రాజా మీడియా అడిగే ప్రశ్నలకు సమాధానం చెప్పారు. కోన వెంకట్, అభిరామ్ గురించి స్పందించాలని విలేకరులు కోరగా.. దీంతో శివాజీ రాజా మాట్లాడుతూ... 'కోన వెంకట్ తో మాకు సంబంధం లేదు.. ఇక అభిరామ్ నటుడు కాదు, నిర్మాత కాదు మాకు సంబంధం లేని విషయం అది' అని వ్యాఖ్యానించారు. కాగా, తాము తెలుగు ఆర్టిస్టులను ప్రోత్సహించడం లేదని శ్రీరెడ్డి చేసిన ఆరోపణలను తోసిపుచ్చారు. తెలుగు ఆర్టిస్టులను టాలీవుడ్ ప్రోత్సహిస్తూనే ఉందని అన్నారు.