దుబాయ్:ఫిల్మ్‌ఫేర్ సౌత్ అవార్డుల వేడుక ఇటీవలే కన్నుల పండువగా ముగిసిన సంగతి తెలిసిందే. త్వరలో సైమా (సౌత్ ఇండియన్ ఇంటర్నేషనల్ మూవీ అవార్డ్స్) వేడుక ప్రారంభం కాబోతోంది. 7వ ఎడిషన్ సైమా అవార్డుల వేడుక ఈ సారి దుబాయ్‌లో ప్లాన్ చేస్తున్నారు.
'సైమా' నిర్వాహకులు వెల్లడించిన వివరాల ప్రకారం సెప్టెంబర్ 7, 8వ తేదీల్లో దుబాయ్‌లో వైభవంగా ఈ అవార్డుల వేడుక జరుగనుంది. కన్నడ, మలయాళం, తమిళ్, తెలుగు నుండి నటీనటులు, సాంకేతిక నిపుణులు ఈ వేడుకకు హాజరుకానున్నారు.
ఈ అవార్డుల వేడుకలో వివిధ కేటగిరీల్లో బెస్ట్ పెర్ఫార్మెన్స్ అవార్డులు ప్రధానం చేయబోతున్నారు. దీంతో పాటు సినీ రంగానికి విశిష్ఠ సేవలు అందించిన ప్రముఖులను సత్కరించనున్నారు. సౌత్‌లోని నాలుగు సినిమా పరిశ్రమలకు చెందిన తారలతో కలర్ ఫుల్‌గా ఈ వేడుక జరుగనుంది.
గతంలో నిర్వహించిన సైమా వేడుకలను తలదన్నేలా ఈ 7వ ఎడిషన్ సెలబ్రేషన్స్ ప్లాన్ చేశారు. అన్ని సినిమా రంగాల నుండి పెద్ద పెద్ద స్టార్లు ఈ వేడుకకు హాజరయ్యేలా నిర్వాహకులు దృష్టి పెట్టారు. త్వరలోనే పూర్తి వివరాలు దినేష్ కుమార్ ఉగ్గిన(అంజన్ స్టార్ ఈవెంట్స్,ఎం.డి) వెల్లడించనున్నారు.