దుబాయ్‌ 50 ఏళ్ళలో సాధించబోయే ప్రగతికి సంబంధించి 'దుబాయ్‌ ఫ్రేమ్‌' అందరికీ అందుబాటులోకి తీసుకొస్తున్నారు. 'దుబాయ్‌ ఫ్రేమ్‌' 2016 ద్వితీయార్ధంలో సాధారణ ప్రజల కోసం ఓపెన్‌ చేయబడుతుంది. దుబాయ్‌ ఫ్రేమ్‌లో గతం గురించీ, ప్రస్తుతం గురించీ కూడా ప్రస్తావించనున్నారు. 50 ఏళ్ళలో దుబాయ్‌ సాధించబోయే ప్రగతి గురించి కూడా ఇందులో పొందుపర్చామని జనరల్‌ ప్రాజెక్ట్‌ డిపార్ట్‌మెంట్‌ ఆఫ్‌ దుబాయ్‌ మునిసిపాలిటీ ఆర్కిటెక్ట్‌ షాజా మహమ్మద్‌ బుష్రా ఫావౌద్‌ చెప్పారు. గతం, ప్రస్తుతం, భవిష్యత్‌ వంటి అంశాలు అందర్నీ ఆశ్చర్యచకితుల్ని చేసేలా దుబాయ్‌ ఫ్రేమ్‌ని రూపొందించారట. మొదట పాత తరంలో దుబాయ్‌, తర్వాత ప్రస్తుత తరం, చివరగా రానున్న యాభయ్యేళ్ళలో దుబాయ్‌లో వచ్చే మార్పులు ఉంటాయి. మెజ్జానైన్‌ ఫ్లోర్‌ నుంచి ఎలివేటర్‌ ద్వారా ఎగ్జిట్‌ అయి, వోర్టెక్స్‌ టన్నెల్‌ ద్వారా ప్రయాణిస్తారు. ఇందులో స్పెషల్‌ లైట్స్‌, సౌండ్‌ ఎఫెక్ట్స్‌తో సంభ్రమాశ్చర్యాలకు గురిచేయనున్నారు నిర్వాహకులు. 205 మిలియన్‌ దిర్హామ్‌లతో చేపట్టిన ఈ ప్రాజెక్ట్‌ రెండున్నరేళ్ళ సమయం తీసుకుంది. అయితే దీనికి సంబంధించి ఎంట్రన్స్‌ ఫీజ్‌ని ఇంకా ఖరారు చేయలేదు.