యూఏఈ: ఈద్ అల్ అధా పండగ సాకుతో అనుమతి లేకుండా బాణాసంచా కాలిస్తే జైలు శిక్ష తప్పదని అబుధాబి పోలీసులు హెచ్చరించారు. ఎవరైనా హద్దుమీరి పటాసులు కాల్చితే ఏడాది తగ్గకుండా జైలు శిక్ష, Dh100,000 తగ్గకుండా జరిమానా విధిస్తామని వార్నింగ్ ఇచ్చారు. ఇక లైసెన్స్ లేకుండా బాణాసంచా అమ్మకాలు నిర్వహించినా, దిగుమతి, ఎగుమతి చేసినా, తయారు చేసినా, బాణాసంచా రవాణా చేసినా తీవ్ర నేరంగా పరిగణిస్తామని, అలాంటి వారికి జైలు శిక్ష, జరిమానా రెండు విధిస్తామని హెచ్చరించారు. తల్లిదండ్రులు తమ పిల్లలు బాణాసంచా కొనుగోలు చేయకుండా, ప్రమాదాలు కొని తెచ్చుకోకుండా నచ్చచెప్పాలని, పటాసులకు బదులు ఇతర ప్రత్యామ్నాయ ఆటల వైపు ప్రొత్సాహించాలని సూచించారు. ఎవరైనా నిబంధనలకు విరుద్ధంగా బాణాసంచా కాలిస్తే వెంటనే 999, 8002626కి ఫోన్ చేసిగానీ, అమన్ సర్వీస్ ద్వారాగానీ తమకు సమాచారం అందించాలని, వివరాలు అందించిన వారి వివరాలను కాన్ఫిడెన్షయల్ గా ఉంచుతామని పోలీసులు తెలిపారు.