యూఏఈ: గర్భంతో వున్న ఓ పిల్లిని రక్షించిన నలుగురు వ్యక్తులకు 50,000 దిర్హాముల బహుమతి ఒక్కొక్కరికీ లభించింది. ఆ పిల్లి ఓ భవనం రెండో అంతస్తు నుంచి కిందికి పడిపోగా, నలుగురు వ్యక్తులు చాకచక్యంగా దాన్ని కాపాడారు. వీరిని దుబాయ్ రూలర్, యూఏఈ ప్రైమ్ మినిస్టర్, వైస్ ప్రెసిడెంట్ షేక్ మొహమ్మద్ బిన్ రషీద్ అల్ మక్తౌమ్ అభినందించారు. దుబాయ్ రూలర్ కార్యాలయం అధికారి ఈ నేపథ్యంలో మొరాకో వాచ్మెన్ అయిన అష్రాఫ్, పాకిస్తానీ సేల్స్‌మేన్ ఆతిఫ్ మొహమ్మద్, నాజర్ అనే ఇండియన్ డ్రైవర్, మొహమ్మద్ రషీద్ అనే మరో వ్యక్తికి నగదుని అందించడం జరిగింది. ఈ ఘటనకు ముందు, ఈ నలుగురు వ్యక్తులూ ఒకరంటే ఒకరికి తెలియనివారే కావడం గమనార్హం. పిల్లిని రక్షించేందుకు వీరంతా నడుం బిగించారు. పైనుంచి పడిపోతున్న పిల్లిని కాపడేందుకు కింద నిలబడి ఓ వస్త్రాన్ని నలుగురూ పట్టుకోగా, దాంట్లో పిల్లి క్షేమంగా పడింది. ఈ వీడియో వైరల్ అవడంతో, దుబాయ్ రూలర్ దృష్టికి వెళ్ళింది.