రాజా చేయివేస్తే సినిమా మంచి విజయం సాధించాలని ఏపీ ముఖ్యమంత్రి చంద్రబాబునాయుడు ఆకాంక్షించారు. ఈ రోజిక్కడ జరిగిన ఆ సినిమా ఆడియో విడుదల కార్యక్రమానికి ఆయన ముఖ్య అతిధిగా హాజరయ్యారు. ఈ సినిమా ఫంక్షన్ కు బాలయ్య రావడం ఎంతో ఆనందంగా ఉందన్నారు. సినిమా రంగం కానీ రాజకీయ రంగం కానీ నందమూరి తారకరామారావు గారి పేరు తలచుకోకుండా ఉండటం సాధ్యం కాదని అన్నారు. ఈ సినిమా హీరో నారా రోహిత్ వరుస సినిమాలతో బాణంలా దూసుకుపోతున్నారని చంద్రబాబు అన్నారు. తమ కుటుంబానికి రాజకీయం, సినిమాలతో అవినాభావ సంబంధం ఉంటుందన్నారు. ఈ సినిమాలో నందమూరి తారక్ విలన్ గా నటించడం సంతోషం అన్నారు. ఎంతో బిజీగా ఉన్నా ఈ సినిమా ఫంక్షన్ కు వచ్చానని చెప్పిన చంద్రబాబు ఈ రోజు చాలా కీలకమైన మూడు విషయాలు జరిగాయన్నారు.
ఈ రోజు తాత్కాలిక సచివాలయ భవన నిర్మాణాలను పరిశీలించేందుకు వెళ్లానని, అక్కడే ఒక స్థూపం చూశానని దానిని బట్టి 700 ఏళ్ల కిందట రాణీ రుద్రమదేవి పట్టాభిషిక్తురాలైన రోజు ఇది అన్నారు. మన రాజధాని నగర నిర్మాణాలు ఎలా ఉండాలో డిజైన్లను చూశామన్నారు.