మస్కట్: సుల్తానేట్ ఆఫ్ ఒమన్‌లో సోమ, మంగళవారాల్లో భారీ వర్షాలు కురుస్తూ సాధారణ జనజీవనం అస్తవ్యస్తంగా మారింది.  ఒమన్ అంతటా వాయుగుండం వర్షాలు, ఉరుములతో కూడిన వర్షం కురిపించడంతో దేశంలోని కొన్ని ప్రాంతాల్లో ఆకస్మిక వరదలు సంభవించాయి. ఉత్తర అల్ షర్కియా గవర్నరేట్‌లోని దాని రెస్క్యూ టీమ్ అల్ ముదైబిలోని విలాయత్‌లో పొంగి ప్రవహిస్తున్న వాడిని దాటుతున్నప్పుడు వాహనం ఇరుక్కుపోయిన సంఘటనలో నలుగురిని రక్షించినట్లు సివిల్ డిఫెన్స్ అండ్ అంబులెన్స్ అథారిటీ (సిడిఎఎ) వెల్లడించింది. అలాగే నిజ్వాలోని విలాయత్‌లోని వాడి మధ్యలో చిక్కుకుపోయిన వాహనంలో ఉన్న ఒక మహిళను రక్షించినట్లు పేర్కొంది.  ప్రతి ఒక్కరూ భద్రతా సూచనలను పాటించాలని పిలుపునిచ్చింది. ఉత్తర అల్ బతినా గవర్నరేట్‌లోని అల్ ఖబూరా విలాయత్‌లో అత్యధికంగా 52 మిల్లీమీటర్ల వర్షపాతం నమోదైంది. ఇజ్కి, అల్ హమ్రా విలాయాత్‌లు.. అల్ దఖిలియా గవర్నరేట్‌లో 40 మిమీల వర్షపాతం నమోదైంది. పిడుగులు పడే సమయంలో ప్రతి ఒక్కరూ జాగ్రత్తలు తీసుకోవాలని, వాడీలను దాటవద్దని, లోతట్టు ప్రాంతాలకు వెళ్లవద్దని, హెచ్చరిక సమయంలో సముద్రంలోకి వెళ్లవద్దని అథారిటీ పిలుపునిచ్చింది.