దోహా: కార్మిక సంస్కరణల కోసం ఖతార్ ప్రభుత్వం తీసుకుంటున్న చర్యలు ఖతార్ నేషనల్ విజన్ 2030కి అనుగుణంగా ఉన్నాయని,  కార్మికుల హక్కులను పరిరక్షించడంలో నిజమైన నిబద్ధతను ప్రదర్శిస్తున్నాయని ఖతార్‌లోని అంతర్జాతీయ కార్మిక సంస్థ (ఐఎల్‌ఓ) ప్రాజెక్ట్ ఆఫీస్ హెడ్ మాక్స్ టునాన్ అన్నారు. నేషనల్ హ్యూమన్ రైట్స్ కమిటీ (ఎన్‌హెచ్‌ఆర్‌సి) హోస్ట్ చేసిన 'హీట్ స్ట్రెస్ ఎట్ వర్క్ సైట్స్' ప్రచారం కార్యక్రమంలో ఆయన పాల్గొని మాట్లాడారు.  కార్మికుల హక్కులు,  ప్రయోజనాలను పరిరక్షించడంలో నిజమైన నిబద్ధత ఉందన్నారు. కార్మికుల భద్రత, ఆరోగ్యానికి సంబంధించి అనేక ఇతర దేశాల కంటే ఖతార్ మెరుగైన స్థితిలో ఉందని పేర్కొన్నారు. 

ఖతార్ కార్మిక మంత్రిత్వ శాఖ 2021 డిక్రీ నెం. 17 ద్వారా వేసవికాలంలో బహిరంగ పని నిషేధించింది. ఖతార్ యొక్క సంస్కరణలను ప్రధాన మానవ హక్కుల సంఘాలు,  ఐక్యరాజ్యసమితి (UN) గుర్తించాయి. కార్మిక సంస్కరణల విషయంలో ఖతార్ అగ్రగామిగా నిలిచింది. ఖతార్ వేగవంతమైన మౌలిక సదుపాయాల అభివృద్ధి, అభివృద్ధి చెందుతున్న ఆర్థిక వ్యవస్థ ప్రపంచవ్యాప్తంగా వందల వేల మంది ప్రవాసులను ఆకర్షిస్తుంది. కార్మికులను రక్షించడానికి విస్తృతమైన సంస్కరణలను అమలు చేసింది. కొత్త చట్టాలను ప్రవేశపెట్టడంతోపాటు, మెజారిటీ కార్మికులు దేశం విడిచి వెళ్లడానికి అనుమతులు అవసరం లేదు. కార్మికులు తమ మునుపటి యజమాని నుండి నో-అబ్జెక్షన్ సర్టిఫికేట్ (NOC) అవసరం లేకుండా ఉద్యోగాన్ని స్వేచ్ఛగా మార్చుకోవడానికి విధానాలను ప్రవేశపెట్టింది. ఇండియా, శ్రీలంక, ఇండోనేషియా, నేపాల్, బంగ్లాదేశ్, పాకిస్తాన్, ఫిలిప్పీన్స్ మరియు ట్యునీషియాలో ఖతార్ వీసా కేంద్రాలు (QVCలు) ఏర్పాటు చేసింది. ఇవి రిక్రూట్‌మెంట్ ప్రక్రియను వేగవంతం చేసేందుకు దోహదం చేస్తున్నారు. కార్మికులకు రక్షణ కల్పించడానికి, వారి హక్కులకు హామీ ఇవ్వడానికి, ఆరోగ్యకరమైన మరియు సురక్షితమైన పని వాతావరణాన్ని అందించడానికి కార్మికుల మద్దతు, బీమా నిధిని కూడా ఖతార్ కార్మిక మంత్రిత్వ శాఖ ఏర్పాటు చేసింది.