దోహా: ఖతార్‌లోని ఆరోగ్య రంగ శ్రామిక శక్తి గత పదేళ్లలో రెట్టింపు అయిందని ప్రజారోగ్య మంత్రిత్వ శాఖ (MoPH)  వెల్లడించింది. ఖతార్‌లోని అందరికీ ప్రపంచ స్థాయి ఆరోగ్య సంరక్షణను ఈ గణంకాలు తెలియజేస్తున్నాయని స్పష్టం చేసింది. 2011లో 20,000 మంది ఆరోగ్య కార్యకర్తలు ఉండగా.. ఖతార్‌లోని ప్రభుత్వ మరియు ప్రైవేట్ ఆరోగ్య రంగాలలో పని చేస్తున్న శ్రామిక శక్తి సంఖ్య 46,000కి పెరిగిందని హమద్ జనరల్ హాస్పిటల్ మెడికల్ డైరెక్టర్ డాక్టర్. యూసఫ్ అల్ మస్లమాని తెలిపారు. గత పదేళ్లలో ఆరోగ్యం మరియు వైద్య శాస్త్ర రంగాలలో గొప్ప అభివృద్ధి జరిగిందని అన్నారు. ఆరోగ్య రంగంలో వేగవంతమైన అభివృద్ధిని కొనసాగించడానికి, తాము అర్హత కలిగిన వైద్య సిబ్బందిని అందించామని, వైద్య పరికరాలను అప్‌గ్రేడ్ చేసినట్లు అల్ మస్లమాని చెప్పారు. MoPH, హమద్ మెడికల్ కార్పొరేషన్ (HMC), ప్రైమరీ హెల్త్ కేర్ కార్పొరేషన్ (PHCC) నర్సింగ్, డెంటల్, ఇతర ఆరోగ్య సంస్థలు గ్రాడ్యుయేటింగ్ టెక్నీషియన్లు, ఫిజియోథెరపిస్ట్‌లు, పోషకాహార నిపుణులతో సహా వైద్య కళాశాలలతో నిరంతరం సమన్వయం చేస్తున్నాయని వివరించారు.  అంతర్జాతీయ ఆరోగ్య సంరక్షణ ప్రమాణాలను అనుసరించి ఆసుపత్రులు, పడకల సంఖ్య పెరిగినందున ఖతార్ ఆరోగ్య రంగంలో అద్భుతమైన వృద్ధిని సాధించిందన్నారు. ప్రతి సంవత్సరం కొత్త ఆసుపత్రులు పెరుగుతున్న జనాభాకు అనుగుణంగా, నిపుణుల ఆరోగ్య సంరక్షణ సేవలను అందించడానికి నిర్మించబడుతున్నాయని  అల్ మస్లామానీ చెప్పారు. ప్రస్తుతం HMC పద్నాలుగు ఆసుపత్రులను నిర్వహిస్తుంది. ఇందులో తొమ్మిది స్పెషలిస్ట్ ఆసుపత్రులు, మూడు కమ్యూనిటీ హాస్పిటల్స్ ఉన్నాయి.