దుబాయ్: దుబాయ్ అంతర్జాతీయ విమానాశ్రయం ద్వారా 8.9 కిలోల గంజాయిని అక్రమంగా తరలించేందుకు ప్రయత్నించిన ఓ ప్రయాణికుడిని పట్టుకున్నారు. సదరు ప్రయాణీకుడు ఆసియా దేశం నుండి ప్రయాణిస్తున్నాడు.  బ్యాగ్ పై అనుమానం కల్గడంతో అధికారులు భద్రతా తనిఖీలు నిర్వహించారు. దుబాయ్ కస్టమ్స్ అధికారులు గందరగోళంగా కనిపించిన ప్రయాణికుడిని మాన్యువల్‌గా తనిఖీ చేశారు. సోదాల్లో పౌడర్ లభించగా, అది గోరింటాకు పొడి అని నిందితుడు పేర్కొన్నాడు. కానీ అది గంజాయి పౌడర్ గా గుర్తించారు. 8.9 కేజీల గంజాయి పౌడర్‌ను స్వాధీనం చేసుకుని దుబాయ్ పోలీసుల వద్ద జనరల్ డైరెక్టరేట్ ఆఫ్ యాంటీ నార్కోటిక్స్‌కు అప్పగించారు.