ప్రముఖ నటుడు, హిందూపురం శాసనసభ్యుడు నందమూరి బాలకృష్ణ తన అమెరికా పర్యటనలో భాగంగా మంగళవారం రాత్రి సిలికాన్‌ వ్యాలీ చేరుకున్నారు. శాన్‌ హోజే విమానాశ్రయంలో దిగిన బాలకృష్ణకు అభిమానులు ఘనంగా స్వాగతం పలికారు. విమానాశ్రయం నుండి మిల్‌ పిటాస్‌లో ఆయన బస చేసిన హోటల్‌ వరకు పెద్ద ఎత్తున కార్ల ప్రదర్శన నిర్వహించారు. బాలకృష్ణ తన భార్య వసుంధరతో కలిసి బుధవారం శాన్‌ హోజే కన్వెన్షన్‌ సెంటర్‌, బయోటెక్‌ పార్క్‌ తదితర ప్రాంతాలు సందర్శించారు. శుక్రవారం బాలకృష్ణ 56వ జన్మదిన వేడుకలు బే ఏరియాలోని ఇండియా కమ్యూనిటి సెంటర్‌ లో నిర్వహిస్తున్నారు. భక్తా భల్లా, గుత్తికొండ ఠాగూర్‌ తదితరులు బాలయ్య పర్యటనలో పాల్గొన్నారు. అంతకు ముందు సీయాటెల్‌ లో నిర్వహించిన హైదరాబాద్‌ ఇండో అమెరికన్‌ క్యాన్సర్‌ ఆస్పత్రి విరాళాల సేకరణ కార్యక్రమంలో బాలకృష్ణ పాల్గొన్నారు.