మనామా: సార్ లో జరిగిన ఘోర కారు ప్రమాదంలో దంపతులు, వారి చిన్న కొడుకు మృతి చెందగా, ఒకే కుటుంబానికి చెందిన ఇద్దరు పిల్లలు తీవ్రంగా గాయపడిన కేసులో బహ్రెయిన్ కు చెందిన డ్రైవర్ కు తొమ్మిది సంవత్సరాల జైలు శిక్ష విధించారు. ఈ విషాదం మే 30న జరిగింది. సదరు డ్రైవర్ మాదకద్రవ్యాలు, మద్యం సేవించి రాంగ్ రూట్లో వేగంగా కారు నడుపుతూ..బాధిత కుటుంబం వెళుతున్న కారును ఢీకొట్టాడు. 

పబ్లిక్ ప్రాసిక్యూషన్ దర్యాప్తులో డ్రైవర్ వాహనం నడిపే ముందు మాదకద్రవ్యాలు తీసుకున్నాడని తేలింది. డ్రగ్ ఎన్‌ఫోర్స్‌మెంట్ యూనిట్ అతని ఇంట్లో విడిగా జరిపిన సోదాల్లో గంజాయి (హాషిష్) బయటపడింది.  

ట్రాఫిక్ కేసులో ఏడవ దిగువ క్రిమినల్ కోర్టు అతనికి ఆరు సంవత్సరాల జైలు శిక్ష విధించింది.  అతని డ్రైవింగ్ లైసెన్స్‌ను రద్దు చేసింది.  ప్రమాదంలో ఉపయోగించిన వాహనాన్ని జప్తు చేయాలని ఆదేశించింది.

ఇక మాదకద్రవ్యాల స్వాధీనం కేసులో మొదటి దిగువ క్రిమినల్ కోర్టు అతనికి అదనంగా మూడు సంవత్సరాల జైలు శిక్ష, BD3,000 జరిమానా విధించింది. స్వాధీనం చేసుకున్న మాదకద్రవ్యాలను జప్తు చేయాలని ఆదేశించింది.