కువైట్: ఇండియా ఇంటర్నేషనల్ స్కూల్, మంగాఫ్ (IISM) స్టూడెంట్ అయిన పదమూడేళ్ల భారతీయ మిక్స్‌డ్ మార్షల్ ఆర్ట్స్ అథ్లెట్ ఇషాక్ ఇంతియాజ్, లెబనాన్‌లోని జౌనీలో జరిగిన ప్రతిష్టాత్మక IMMAF ఆసియా MMA ఛాంపియన్‌షిప్ 2025లో సిల్వర్ మెడల్ సాధించాడు.

ప్రస్తుతం కువైట్‌లో నివసిస్తూ, ఇక్కడే శిక్షణ పొందుతున్న ఇషాక్..యూత్ సి (అండర్ 14) విభాగంలో టీమ్ ఇండియాకు ప్రాతినిధ్యం వహించాడు.52 కిలోల యూత్ సి విభాగంలో పోటీపడిన ఇషాక్.. పాలస్తీనియన్ ప్రత్యర్థిపై విజయంతో తన ప్రస్థానాన్ని ప్రారంభించాడు. ఆ తర్వాత అతను ఒక తజికిస్తాన్ ఫైటర్‌ను కేవలం 29 సెకన్లలోనే ఓడించి, ఆ విభాగంలోనే అత్యంత వేగవంతమైన సబ్మిషన్‌ను నమోదు చేశాడు. అతని మూడవ మ్యాచ్‌లో లెబనీస్ ప్రత్యర్థిపై విజయాన్ని నమోదు చేశాడు. ఫైనల్‌లో మరో లెబనీస్ ఫైటర్‌తో హోరాహోరీగా జరిగిన పోరులో ఇషాక్ తృటిలో స్వర్ణ పతకాన్ని కోల్పోయాడు.  

ఇషాక్ కువైట్‌లోని ఒక ప్రఖ్యాత MMA శిక్షణా కేంద్రంలో శిక్షణ పొందుతున్నాడు.  తన కుమారుడి విజయం పట్ల కరాటేలో బ్లాక్ బెల్ట్ అయిన ఇషాక్ తండ్రి ఇంతియాజ్ హాజా మైదీన్ హర్షం వ్యక్తం చేశాడు. తాము ఇషాక్ పట్ల చాలా గర్వపడుతున్నట్టు చెప్పారు. కేవలం 13 ఏళ్ల వయస్సులో కువైట్‌లో శిక్షణ పొందుతూ సిల్వర్ మెడల్ గెల్వడం నిజంగా ఒక అద్భుతమని పేర్కొన్నాడు.