దోహా: కువైట్‌లో ఖతార్ జాతీయ పేమెంట్ కార్డు 'హిమ్యాన్' కు అనుమతి ఇచ్చారు. ఈ మేరకు ఖతార్ సెంట్రల్ బ్యాంక్ తెలిపింది. ఖతార్ మూడవ ఆర్థిక రంగ వ్యూహానికి అనుగుణంగా చేపట్టిన ప్రయత్నాల కారణంగా ఇది సాధ్యమైందని వెల్లడించింది. అదే సమయంలో డిజిటల్ చెల్లింపు వ్యవస్థలు, సేవలను మెరుగుపరచడానికి ఇది దోహదం చేస్తుందన్నారు.

అలాగే GCC దేశాల మధ్య సహకారాన్ని బలోపేతం చేయడానికి ఖతార్ సెంట్రల్ బ్యాంక్ చేస్తున్న ప్రయత్నాలలో భాగంగా "హిమ్యాన్"ను కువైట్ లో అంగీకరిస్తున్నట్లు ప్రకటించడాన్ని ఖతార్ సెంట్రల్ బ్యాంక్ స్వాగతించింది. హిమ్యాన్ కార్డుదారులు ఇప్పుడు అత్యున్నత భద్రత ప్రమాణాలకు అనుగుణంగా, కువైట్ వ్యాప్తంగా ఉన్న వివిధ పాయింట్ ఆఫ్ సేల్స్ మరియు ఏటీఎంలలో కొనుగోలు లావాదేవీలు మరియు నగదు ఉపసంహరణలు చేయవచ్చని తెలిపింది.

"హిమ్యాన్" కార్డును ఖతార్ సెంట్రల్ బ్యాంక్ యాజమాన్యంలోని, ఖతారీ వాణిజ్య బ్రాండ్‌తో కూడిన మొదటి జాతీయ చెల్లింపు కార్డుగా పరిగణిస్తారు.