యూఏఈ: యూఏఈలో ఎలక్ట్రిక్ స్కూటర్లు, ఎలక్ట్రిక్ సైకిళ్లు వినియోగించే వారికి కేంద్ర ప్రభుత్వం కొత్త ట్రాఫిక్ నిబంధనలను తీసుకొచ్చింది. 2027 జనవరి 1 నుంచి ఈ నిబంధనలు అమల్లోకి రానున్నాయి. కొత్త నిబంధనల ప్రకారం ఎలక్ట్రిక్ స్కూటర్ నడిపేందుకు సంబంధిత అధికారుల నుంచి తప్పనిసరిగా పర్మిట్ పొందాలి. ఇందుకు దరఖాస్తు చేసుకునే వారి కనీస వయసు 15 ఏళ్లుగా నిర్ణయించారు. క్యాబినెట్ తీర్మానం నంబర్ 174 ఆఫ్ 2026 ప్రకారం ఈ కొత్త నిబంధనలను రూపొందించారు. జారీ చేసే పర్మిట్ మూడేళ్ల పాటు చెల్లుబాటులో ఉంటుంది. ఎలక్ట్రిక్ స్కూటర్లు, ఎలక్ట్రిక్ సైకిళ్లు, మోపెడ్లకు ఈ నిబంధనలు వర్తిస్తాయి. ఈ వాహనాలను ఉపయోగించే వారు సంబంధిత లైసెన్సింగ్ లేదా ట్రాఫిక్ అధికారుల నుంచి అనుమతి పొందడంతో పాటు వాహనాలను కూడా నిర్దేశిత విధానంలో రిజిస్ట్రేషన్ చేయించుకోవాలి.

దుబాయ్‌లో ఇప్పటికే 16 ఏళ్ల నిబంధన

కొత్త ఫెడరల్ నిబంధనల ప్రకారం పర్మిట్ దరఖాస్తుదారుల కనీస వయసు 15 ఏళ్లుగా నిర్ణయించారు. అయితే దుబాయ్‌లో ప్రస్తుతం 16 ఏళ్లలోపు వారు ఈ-స్కూటర్లు నడపడానికి అనుమతి లేదు. కొత్త ఫెడరల్ నిబంధనలు, దుబాయ్‌లో అమల్లో ఉన్న వయోపరిమితి మధ్య సమన్వయం ఎలా ఉంటుందనే దానిపై స్పష్టత ఇవ్వలేదు.

ట్రాఫిక్ సిగ్నళ్ల వద్ద ప్రత్యేక నిబంధనలు

ఎలక్ట్రిక్ స్కూటర్ వినియోగదారులు ట్రాఫిక్ సిగ్నళ్ల నిబంధనలను తప్పనిసరిగా పాటించాలి. రెడ్ సిగ్నల్ ఉన్నప్పుడు రోడ్డు దాటకూడదు. గ్రీన్ సిగ్నల్ వచ్చినప్పుడు మాత్రమే నిబంధనలకు అనుగుణంగా రోడ్డు దాటాలి. గ్రీన్ లైట్ ఫ్లాష్ అవుతున్న సమయంలో కొత్తగా రోడ్డు దాటడం ప్రారంభించకూడదు. ఇప్పటికే దాటడం ప్రారంభించిన వారు మాత్రం దాటడం పూర్తి చేసుకోవచ్చు.

స్కూటర్లకు భద్రతా పరికరాలు తప్పనిసరి

కొత్త నిబంధనల ప్రకారం ఎలక్ట్రిక్ స్కూటర్లలో రాత్రివేళ రోడ్డు కనిపించేలా ముందు భాగంలో హెడ్‌లైట్, వెనుక లైట్, బ్రేక్ వేసినప్పుడు వెలిగే రెడ్ బ్రేక్ లైట్ ఉండాలి. హ్యాండిల్‌కు శబ్దం చేసే హారన్ లేదా వార్నింగ్ పరికరం అమర్చాలి. కనీసం వెనుక చక్రానికి బ్రేక్ తప్పనిసరిగా ఉండాలి. టైర్లు సరిగ్గా అమర్చబడి, వినియోగానికి అనుకూలంగా ఉండాలి. చక్రాలకు సంబంధించిన స్పోక్స్ కూడా పటిష్ఠంగా ఉండాలి. స్కూటర్‌లోని అన్ని విడిభాగాలు సురక్షితంగా బిగించి ఉండాలి. అవసరాన్ని బట్టి అదనపు భద్రతా నిబంధనలను విధించే అధికారం లైసెన్సింగ్ సంస్థలకు ఉంటుంది.

ఎక్కడ పడితే అక్కడ స్కూటర్లు నడపకూడదు

ఎలక్ట్రిక్ స్కూటర్లను సంబంధిత ట్రాఫిక్, లైసెన్సింగ్ అధికారులు ప్రత్యేకంగా కేటాయించిన మార్గాల్లోనే నడపాలి. ఆయా మార్గాల్లో నిర్దేశించిన వేగ పరిమితులను పాటించాలి. మోటారు వాహనాల రాకపోకల కోసం కేటాయించిన రోడ్లపై ఈ-స్కూటర్లకు అనుమతి ఉండదు. వ్యక్తిగతంగా కొనుగోలు చేసిన స్కూటర్లతో పాటు అద్దెకు తీసుకున్న స్కూటర్లకూ ఈ నిబంధనలు వర్తిస్తాయి. రెండు లేదా అంతకంటే ఎక్కువ చక్రాలు, ఎలక్ట్రిక్ మోటార్‌తో పనిచేస్తూ నిలబడి లేదా కూర్చుని నడపగలిగే వాహనాన్ని ఎలక్ట్రిక్ స్కూటర్‌గా కొత్త నిబంధనలు నిర్వచించాయి.

ప్రమాదాల పెరుగుదలతో భద్రతపై దృష్టి

యూఏఈలో ఈ-స్కూటర్ల ప్రమాదాలు పెరుగుతున్న నేపథ్యంలో ప్రభుత్వం కొత్త నిబంధనలను తీసుకొచ్చింది. ఖలీజ్ టైమ్స్ నివేదిక ప్రకారం, రోడ్‌సేఫ్టీ యూఏఈ సంస్థ హోం మినిస్ట్రీ గణాంకాలను విశ్లేషించగా, 2025లో తీవ్రమైన ఈ-స్కూటర్ ప్రమాదాలు అంతకుముందు ఏడాదితో పోలిస్తే 97 శాతం పెరిగాయి. రోడ్‌సేఫ్టీ యూఏఈ, అల్ వత్బా ఇన్సూరెన్స్ సంయుక్తంగా 1,010 మంది నివాసితులతో నిర్వహించిన సర్వేలో 93 శాతం మంది ఈ-స్కూటర్ వినియోగదారులు నిర్లక్ష్యంగా లేదా ప్రమాదకరంగా నడపడం చూశామని తెలిపారు. అలాగే 89 శాతం మంది అనుమతి లేని ప్రాంతాల్లో స్కూటర్లు నడపడం గమనించినట్లు చెప్పారు. అయినప్పటికీ 60 శాతం మంది ఈ-స్కూటర్లు రవాణా అవసరాలను తీర్చడంలో కీలక పాత్ర పోషిస్తున్నాయని అభిప్రాయపడ్డారు.

కొత్త నిబంధనలు అమల్లోకి వచ్చిన తర్వాత ఈ-స్కూటర్ వినియోగదారులు పర్మిట్లు, రిజిస్ట్రేషన్, భద్రతా ప్రమాణాలు, నిర్దేశిత మార్గాలకు సంబంధించిన నిబంధనలను తప్పనిసరిగా పాటించాల్సి ఉంటుంది.