దుబాయ్‌: భారత్‌, యూఏఈ మధ్య పెట్టుబడులు, సాంకేతిక ఆవిష్కరణలు, స్టార్టప్‌ల అభివృద్ధికి మరింత ప్రోత్సాహం కల్పించే దిశగా కీలక ముందడుగు పడింది. దుబాయ్‌ ఫ్యూచర్‌ డిస్ట్రిక్ట్‌ ఫండ్‌ (DDF), బ్యూమెర్క్‌ కార్పొరేషన్‌ లిమిటెడ్‌ సంస్థలు వ్యూహాత్మక సహకార ఒప్పందంపై సంతకాలు చేశాయి. దుబాయ్‌లోని భారత కాన్సులేట్‌ జనరల్‌ కార్యాలయంలో జరిగిన ఈ కార్యక్రమంలో యూఏఈలో భారత రాయబారి డాక్టర్‌ దీపక్‌ మిట్టల్‌, దుబాయ్‌లో భారత కాన్సుల్‌ జనరల్‌ డాక్టర్‌ ఈ. విష్ణువర్ధన్‌ రెడ్డితో పాటు పలువురు ప్రముఖులు పాల్గొన్నారు.

ఈ ఒప్పందం ద్వారా దుబాయ్‌లో వెంచర్‌ క్యాపిటల్‌ వ్యవస్థను మరింత బలోపేతం చేయడంతో పాటు, భారతీయ స్టార్టప్‌లకు అంతర్జాతీయ అవకాశాలను విస్తరించడంపై రెండు సంస్థలు దృష్టి సారించనున్నాయి. మార్కెట్‌ సమాచారం, పెట్టుబడులకు సంబంధించిన పరిజ్ఞానాన్ని పరస్పరం పంచుకోవడం, వ్యాపారవేత్తలు, స్టార్టప్‌ వ్యవస్థాపకులు, వెంచర్‌ క్యాపిటల్‌ మేనేజర్లు దుబాయ్‌లో తమ కార్యకలాపాలను విస్తరించేందుకు సహకరించడం ఈ భాగస్వామ్యంలోని ప్రధాన అంశాలు.

అలాగే వ్యవస్థాపకుల కోసం ప్రత్యేక కార్యక్రమాలు నిర్వహించడం, వ్యాపార ప్రతినిధి బృందాల పర్యటనలు, పెట్టుబడులు మరియు ఆవిష్కరణలకు సంబంధించిన ఉమ్మడి కార్యక్రమాలను చేపట్టేందుకు రెండు సంస్థలు ప్రణాళికలు రూపొందించనున్నాయి.

దుబాయ్‌ ఆర్థిక ప్రణాళికకు అనుగుణంగా భాగస్వామ్యం

దుబాయ్‌ ప్రభుత్వం ప్రతిష్ఠాత్మకంగా చేపట్టిన ఆర్థిక ప్రణాళిక డీ33 (Dubai Economic Agenda D33) లక్ష్యాలకు అనుగుణంగా ఈ ఒప్పందం కుదిరింది. దుబాయ్‌ ఆర్థిక వ్యవస్థను రెట్టింపు చేయడంతో పాటు, పెట్టుబడులు, నివాసం, ఉపాధి అవకాశాల పరంగా ప్రపంచంలోని మూడు అగ్రగామి నగరాల్లో ఒకటిగా నిలపడం డీ33 ప్రధాన లక్ష్యం.

ప్రపంచవ్యాప్తంగా ఉన్న పారిశ్రామికవేత్తలు, పెట్టుబడిదారులు, స్టార్టప్‌ వ్యవస్థాపకులకు దుబాయ్‌ ఆకర్షణీయమైన కేంద్రంగా మారుతోంది. ముఖ్యంగా భారతీయ వ్యవస్థాపకులు తమ వ్యాపారాలను అంతర్జాతీయ స్థాయికి తీసుకెళ్లేందుకు దుబాయ్‌ను కీలక వేదికగా ఎంచుకుంటున్నారు. ఈ నేపథ్యంలో భారత్‌, యూఏఈ మధ్య పెట్టుబడుల అనుసంధానాన్ని మరింత బలోపేతం చేయడంలో ఈ భాగస్వామ్యం కీలకంగా మారనుంది.

దుబాయ్‌ వెంచర్‌ క్యాపిటల్‌ రంగంలో కీలక పాత్ర పోషిస్తున్న డీఎఫ్‌డీఎఫ్‌, పెట్టుబడుల వ్యవస్థను అభివృద్ధి చేయడంపై దృష్టి సారిస్తోంది. భారతీయ మూలాలు కలిగిన దుబాయ్‌ ఆధారిత పెట్టుబడి సంస్థ బ్యూమెర్క్‌.. భారత్‌, యూఏఈ మార్కెట్లపై తనకున్న అవగాహన, దీర్ఘకాలిక పెట్టుబడి వ్యూహాలతో ఈ భాగస్వామ్యంలో పాలుపంచుకోనుంది.

భారత్‌–యూఏఈ సంబంధాలకు మరింత బలం

యూఏఈలో భారత రాయబారి డాక్టర్‌ దీపక్‌ మిట్టల్‌ మాట్లాడుతూ, భారత్‌, యూఏఈ మధ్య ఇప్పటికే బలంగా ఉన్న ద్వైపాక్షిక సంబంధాలను మరింత విస్తరించేందుకు ఈ ఒప్పందం దోహదపడుతుందని పేర్కొన్నారు. వెంచర్‌ క్యాపిటల్‌ రంగంలో సహకారాన్ని పెంపొందించడం ద్వారా రెండు దేశాల మధ్య పెట్టుబడులు, ఆవిష్కరణలకు కొత్త అవకాశాలు ఏర్పడతాయని తెలిపారు.

దుబాయ్‌లో భారత కాన్సుల్‌ జనరల్‌ డాక్టర్‌ ఈ. విష్ణువర్ధన్‌ రెడ్డి మాట్లాడుతూ, డీఎఫ్‌డీఎఫ్‌, బ్యూమెర్క్‌ మధ్య భాగస్వామ్యం భారత్‌, యూఏఈ మధ్య సాంకేతికత, ఆవిష్కరణల రంగాల్లో సహకారానికి కొత్త అధ్యాయాన్ని ప్రారంభిస్తుందని అన్నారు. ఈ ఒప్పందం ద్వారా భారతీయ స్టార్టప్‌లకు యూఏఈ వెంచర్‌ క్యాపిటల్‌ వ్యవస్థను చేరుకునే అవకాశాలు మెరుగుపడటంతో పాటు, రెండు దేశాల పారిశ్రామికవేత్తలు, పెట్టుబడిదారుల మధ్య సహకారం పెరుగుతుందని వివరించారు.

దీర్ఘకాలిక పెట్టుబడులకు ప్రాధాన్యం

దుబాయ్‌ ఫ్యూచర్‌ డిస్ట్రిక్ట్‌ ఫండ్‌ చైర్మన్‌, దుబాయ్‌ ఫ్యూచర్‌ ఫౌండేషన్‌ చీఫ్‌ ఎగ్జిక్యూటివ్‌ ఆఫీసర్‌ ఖల్ఫాన్‌ బెల్హౌల్‌ మాట్లాడుతూ, భారత్‌, యూఏఈ మధ్య సంబంధాల్లో ఆవిష్కరణలు కీలకమైన పాత్ర పోషిస్తున్నాయని తెలిపారు. ప్రపంచవ్యాప్తంగా ప్రతిభావంతులైన వ్యవస్థాపకులు, పెట్టుబడిదారులు, వినూత్న ఆలోచనలకు దుబాయ్‌ను కేంద్రంగా మార్చాలన్న డీ33 లక్ష్య సాధనకు బ్యూమెర్క్‌ వంటి దీర్ఘకాలిక భాగస్వామ్యాలు దోహదపడతాయని పేర్కొన్నారు.

దుబాయ్‌ ఇంటర్నేషనల్‌ ఫైనాన్షియల్‌ సెంటర్‌ (డీఐఎఫ్‌సీ) అథారిటీ చీఫ్‌ ఎగ్జిక్యూటివ్‌ ఆఫీసర్‌ అరిఫ్‌ అమిరి మాట్లాడుతూ, వివిధ దేశాల ఆర్థిక వ్యవస్థలు, పెట్టుబడులు, వ్యాపార అవకాశాలను అనుసంధానించడం ద్వారా దుబాయ్‌ అంతర్జాతీయ స్థాయిలో తన స్థానాన్ని బలోపేతం చేసుకుందని అన్నారు. భారత్‌తో రెండు దశాబ్దాలకు పైగా వ్యాపార, పెట్టుబడి సంబంధాలను అభివృద్ధి చేస్తున్న డీఐఎఫ్‌సీ, ఈ భాగస్వామ్యం ద్వారా భారతీయ వ్యవస్థాపకులు దుబాయ్‌ నుంచి అంతర్జాతీయ మార్కెట్లలోకి విస్తరించేందుకు మరిన్ని అవకాశాలు ఏర్పడతాయని ఆశాభావం వ్యక్తం చేశారు.

డీఎఫ్‌డీఎఫ్‌ మేనేజింగ్‌ డైరెక్టర్‌ నాదర్‌ అల్‌ బస్తాకీ మాట్లాడుతూ, స్వల్పకాలిక లావాదేవీల కంటే దీర్ఘకాలిక సంబంధాల ద్వారా దుబాయ్‌ వెంచర్‌ క్యాపిటల్‌ వ్యవస్థను అభివృద్ధి చేయాలన్న లక్ష్యం తమ రెండు సంస్థలకు ఉందన్నారు. యూఏఈ, భారత్‌ మార్కెట్లపై బ్యూమెర్క్‌కు ఉన్న అవగాహన, దుబాయ్‌లోని పెట్టుబడిదారులు, ఫండ్‌ మేనేజర్లు, వ్యవస్థాపకులతో డీఎఫ్‌డీఎఫ్‌కు ఉన్న అనుసంధానం కలిపి మరిన్ని అంతర్జాతీయ సంస్థలను దుబాయ్‌కు ఆకర్షించేందుకు దోహదపడతాయని తెలిపారు.

బ్యూమెర్క్‌ కార్పొరేషన్‌ ఎగ్జిక్యూటివ్‌ చైర్మన్‌, చీఫ్‌ ఎగ్జిక్యూటివ్‌ ఆఫీసర్‌ సిద్ధార్థ్‌ బాలచంద్రన్‌ మాట్లాడుతూ, భారతీయ వ్యవస్థాపకులు ప్రపంచ స్థాయి సాంకేతిక సంస్థలను అభివృద్ధి చేస్తున్నారని, అంతర్జాతీయ మార్కెట్లలోకి ప్రవేశించేందుకు దుబాయ్‌ కీలక ద్వారంగా మారిందని పేర్కొన్నారు. డీఎఫ్‌డీఎఫ్‌తో భాగస్వామ్యం ద్వారా డీ33 లక్ష్యాలకు అనుగుణంగా వెంచర్‌ క్యాపిటల్‌ వ్యవస్థను బలోపేతం చేయడంతో పాటు, భారత్‌, యూఏఈ మధ్య దీర్ఘకాలిక ఆర్థిక, వ్యూహాత్మక సంబంధాలను మరింత విస్తరించేందుకు కృషి చేస్తామని తెలిపారు.

ఈ ఒప్పందం ద్వారా భారత్‌, యూఏఈ స్టార్టప్‌లు, పెట్టుబడిదారుల మధ్య పరస్పర సహకారం పెరగడంతో పాటు, సాంకేతిక ఆవిష్కరణలు, అంతర్జాతీయ పెట్టుబడులు, వ్యాపార విస్తరణకు కొత్త మార్గాలు ఏర్పడతాయని భావిస్తున్నారు. ప్రపంచ స్థాయి వ్యాపార, పెట్టుబడి, ఆవిష్కరణల కేంద్రంగా దుబాయ్‌ స్థానాన్ని మరింత బలోపేతం చేయడంలో ఈ భాగస్వామ్యం కీలకంగా నిలవనుంది.