దుబాయ్: యూఏఈలో పనిచేసే చాలా మంది ఉద్యోగులకు ఒక సాధారణ సందేహం ఉంటుంది— "వార్షిక సెలవులు (Annual Leave) మంజూరైన తర్వాత కూడా ఆఫీసు పని చేయమని యాజమాన్యం అడగవచ్చా?". ముఖ్యంగా ప్రాజెక్ట్ డెడ్ లైన్లు ఉన్నప్పుడు బాస్ నుండి వచ్చే ఒత్తిడిని ఎలా ఎదుర్కోవాలో తెలియక చాలా మంది ఇబ్బంది పడుతుంటారు. దీనిపై యూఏఈ ఉపాధి చట్టం (Employment Law) స్పష్టమైన నిబంధనలను కలిగి ఉంది.

సెలవుల్లో పని చేయమని అడగవచ్చా?

చట్టపరంగా, ఒకసారి వార్షిక సెలవు ఆమోదించబడిన తర్వాత, ఆ సమయంలో పని చేయమని యజమాని మిమ్మల్ని బలవంతం చేయకూడదు.

• చట్టం (Article 29): యజమాని పని అవసరాలను బట్టి సెలవు తేదీలను నిర్ణయించవచ్చు (కనీసం ఒక నెల ముందుగా సమాచారం ఇవ్వాలి), కానీ సెలవులో ఉన్నప్పుడు పని చేయమని ఆదేశించే హక్కు చట్టబద్ధంగా లేదు.
ఒకవేళ పని చేస్తే పరిహారం ఏంటి?

మీరు మరియు మీ యజమాని పరస్పర అంగీకారంతో సెలవుల్లో పని చేయాలని నిర్ణయించుకుంటే, దానికి ప్రతిఫలంగా ఈ క్రిందివి అందాలి:

1. అదనపు వేతనం (Extra Pay): ఆ రోజులకు సరిపడా జీతం చెల్లించాలి.
2. ప్రత్యామ్నాయ సెలవు: పని చేసిన రోజులకు బదులుగా తర్వాత రోజుల్లో సెలవులను మంజూరు చేయాలి.

ప్రాజెక్ట్ పూర్తి కాలేదని ఉద్యోగం నుండి తీసేయవచ్చా?

ప్రాజెక్ట్ గడువు (Deadline) మరియు మీ సెలవు తేదీలు ఒకేసారి వచ్చినప్పుడు, పని పూర్తి కాలేదనే కారణంతో మిమ్మల్ని ఉద్యోగం నుండి తొలగించడం చట్టవిరుద్ధం.

• ఆర్బిట్రరీ డిస్మిసల్ (Arbitrary Dismissal): చట్టబద్ధంగా మంజూరైన సెలవులో ఉన్నందుకు లేదా పని పూర్తి చేయలేదని తొలగిస్తే, దానిని 'అన్యాయమైన తొలగింపు'గా పరిగణించవచ్చు (Article 47).
• పరిహారం: ఒకవేళ కోర్టులో ఇది నిరూపితమైతే, యజమాని సదరు ఉద్యోగికి మూడు నెలల జీతం వరకు పరిహారంగా చెల్లించాల్సి ఉంటుంది.
ఉద్యోగికి ఉన్న ఆప్షన్లు ఇవే:

1. చర్చలు: మీ సెలవును ప్రాజెక్ట్ పూర్తయ్యే వరకు వాయిదా వేయమని (Reschedule) కోరవచ్చు.
2. నిరాకరణ: సెలవులో పని చేయడం ఇష్టం లేకపోతే, చట్టప్రకారం మీరు దానిని సున్నితంగా తిరస్కరించవచ్చు.
3. ఫిర్యాదు: ఒకవేళ యాజమాన్యం మిమ్మల్ని వేధిస్తున్నా లేదా ఒత్తిడి చేస్తున్నా, మీరు మానవ వనరులు మరియు ఎమిరాటైజేషన్ మంత్రిత్వ శాఖ (MOHRE)కు ఫిర్యాదు చేయవచ్చు.
యూఏఈ చట్టం ఉద్యోగి యొక్క విశ్రాంతి సమయాన్ని (Rest period) గౌరవిస్తుంది. పని అవసరాల దృష్ట్యా అడ్జస్ట్ అవ్వడం మంచిదే అయినా, అది మీ హక్కులను కాలరాయకూడదు.

--బాజీ షేక్(యూఏఈ)