న్యూ ఢిల్లీ: భారత పొరుగు దేశమైన చైనాతో సరిహద్దు వివాదాలు మరియు దౌత్యపరమైన సవాళ్లు కొనసాగుతున్న నేపథ్యంలో, కేంద్ర విదేశీ వ్యవహారాల మంత్రిత్వ శాఖ (MEA) గురువారం ఒక కీలక ప్రకటన చేసింది. సీనియర్ ఐఎఫ్ఎస్ అధికారి విక్రమ్ కె. దొరైస్వామిని చైనాలో భారత తదుపరి రాయబారిగా నియమిస్తున్నట్లు విదేశీ వ్యవహారాల మంత్రిత్వ శాఖ (MEA) గురువారం ప్రకటించింది. ప్రస్తుతం చైనాలో భారత రాయబారిగా ఉన్న ప్రదీప్ కుమార్ రావత్ స్థానంలో ఆయన బాధ్యతలు స్వీకరించనున్నారు.

1992 బ్యాచ్‌కు చెందిన ఇండియన్ ఫారిన్ సర్వీస్ (ఐఎఫ్ఎస్) అధికారి అయిన విక్రమ్ దొరైస్వామికి దౌత్య రంగంలో అపారమైన అనుభవం ఉంది. ప్రస్తుతం ఆయన యునైటెడ్ కింగ్‌డమ్ (యూకే)లో భారత హైకమిషనర్‌గా బాధ్యతలు నిర్వర్తిస్తున్నారు. అంతకుముందు బంగ్లాదేశ్‌లో భారత హైకమిషనర్‌గా పని చేసిన కాలంలో రెండు దేశాల మధ్య సంబంధాలను బలోపేతం చేయడంలో ఆయన కీలక పాత్ర పోషించారు. ఇప్పుడు బీజింగ్‌లో భారత మిషన్‌కు నాయకత్వం వహించే బాధ్యతను ప్రభుత్వం ఆయనకు అప్పగించింది.