యూఏఈ: హంటావైరస్ గురించిన వార్తలు సోషల్ మీడియాలో హల్చల్ చేస్తున్నాయి. అయితే, ఇది అంత ప్రమాదకరం కాదని, ఈ వైరస్ ప్రజల మధ్య అంత సులభంగా వ్యాపించదని,  కోవిడ్-19 కంటే చాలా భిన్నంగా ప్రవర్తిస్తుందని యూఏఈలోని వైద్యులు నివాసితులకు భరోసా ఇస్తున్నారు.

నేషనల్ ఎమర్జెన్సీ క్రైసిస్ అండ్ డిజాస్టర్ మేనేజ్‌మెంట్ అథారిటీ (NCEMA) మరియు ఆరోగ్య మంత్రిత్వ శాఖ (MoHAP) పరిస్థితితులను నిశితంగా పర్యవేక్షిస్తున్నట్లు ప్రకటించాయి.  హంటావైరస్ ఇన్ఫెక్షన్లు తీవ్రమైనవి అయినప్పటికీ, ఈ వైరస్ చాలా అరుదుగా ఉంటుందని, ఇది ప్రధానంగా రోజువారీ సామాజిక చర్యల కంటే, వైరస్ కలిగిన ఎలుకలు మరియు కలుషితమైన పరిసరాలతో సంబంధం కలిగి ఉంటుందని ఆరోగ్య సంరక్షణ నిపుణులు తెలిపారు.

 హంటావైరస్ అంటే ఏమిటి?

హంటావైరస్ అనేది సహజంగా ఎలుకలకు సోకే వైరస్‌లు. ఇది అప్పుడప్పుడు మానవులకు కూడా వ్యాపిస్తుంది. దుబాయ్‌లోని అల్ నహ్దాలో ఉన్న ఎన్‌ఎంసి స్పెషాలిటీ హాస్పిటల్‌లో కన్సల్టెంట్ ఇంటర్నల్ మెడిసిన్ అయిన డాక్టర్ శ్రీనివాస రావు పోలుమూరు ప్రకారం, దుమ్ము ఎక్కువగా ఉండే లేదా గాలి సరిగ్గా ప్రసరించని ప్రదేశాలలో ఎలుకల మూత్రం, రెట్టలు లేదా లాలాజలంతో సంబంధంలోకి వచ్చిన తర్వాత ప్రజలకు ఈ వ్యాధి సోకుతుంది.

హంటావైరస్ మరో కోవిడ్-19 లాంటిదేనా?

ప్రస్తుతం ఈ వైరస్‌కు సంబంధించి ఉన్న అతిపెద్ద అపోహలలో ఇది ఒకటని వైద్యులు చెప్పారు. వ్యాప్తి చెందే గుణం లేదా మహమ్మారిగా మారే సామర్థ్యం విషయంలో హంటావైరస్ కోవిడ్-19 లాగా ప్రవర్తించదని డాక్టర్లు తెలిపారు. గాలి ద్వారా ఒకరి నుండి మరొకరికి సులభంగా వ్యాపించే కోవిడ్-19లా కాకుండా, హంటావైరస్ మనుషుల మధ్య వ్యాపించడం చాలా అరుదని, ఇది ప్రధానంగా ఎలుకల నుండి మనుషులకు వ్యాపిస్తుందని పల్మనాలజిస్ట్ స్పెషలిస్ట్ డాక్టర్ ముహమ్మద్ అస్లాం చెప్పారు.    

ఎవరికి ఎక్కువ ప్రమాదం ఉంది?

పాడుబడిన భవనాలు, గిడ్డంగులు, పొలాలు, నిల్వ గదులు మరియు ఎలుకల బెడద ఉన్న ప్రదేశాలు వంటి మూసి ఉన్న లేదా గాలి, వెలుతురు సరిగా ప్రసరించని ప్రాంతాలు అధిక ప్రమాదం ఉన్న పరిసరాలుగా ఉంటాయని డాక్టర్లు తెలిపారు. సాధారణ నగరవాసులకు ప్రమాదం తక్కువగానే ఉంటుందన్నారు.  ఆఫీసులు, పాఠశాలలు, షాపింగ్ మాల్స్ లేదా ప్రజా రవాణా వంటి ప్రదేశాలలో హంటావైరస్ సులభంగా వ్యాపించదని కూడా వైద్యులు చెప్పారు.

ప్రజలు ఏ లక్షణాలను గమనించాలి?

ప్రారంభ లక్షణాలు సాధారణ వైరల్ అనారోగ్యాలను పోలి ఉంటాయని వైద్యులు చెప్పారు. వీటిలో జ్వరం, అలసట, ఒళ్ళు నొప్పులు, తలనొప్పులు, చలి, వికారం, కడుపులో అసౌకర్యం ఉంటాయి. మరింత తీవ్రమైన సందర్భాల్లో దగ్గు మరియు శ్వాస తీసుకోవడంలో ఇబ్బందులు తలెత్తవచ్చని తెలిపారు. అధిక ప్రమాదం ఉన్న ప్రాంతాల నుండి తిరిగి వచ్చేవారు లేదా విదేశాలలో బహిరంగ లేదా గ్రామీణ కార్యకలాపాలలో పాల్గొనేవారు, లక్షణాలు కనిపిస్తే వైద్య సహాయం తీసుకోవాలని డాక్టర్లు సూచించారు.

నివాసితులు ఎలాంటి జాగ్రత్తలు తీసుకోవాలి?

భయం కంటే అవగాహన మరియు సాధారణ జాగ్రత్తలు చాలా ముఖ్యమని వైద్యులు చెప్పారు. దుమ్ము ఎక్కువగా ఉన్న లేదా మూసి ఉన్న ప్రదేశాలను శుభ్రపరిచే నివాసితులకు కొన్ని సలహాలను జారీ చేశారు. 

-శుభ్రపరిచే ముందు గదులలో గాలి వచ్చేలా చూడాలి.

-పొడి దుమ్మును ఊడ్చడం మానుకోవాలి.

-అవసరమైనప్పుడు గ్లౌజులు, మాస్క్‌లు ధరించాలి.

-నేలను తుడిచే ముందు ఉపరితలాలను క్రిమిరహిత ద్రావణాలతో క్లీన్ చేయాలి.

 హంటావైరస్ అనేది ప్రధానంగా ఎలుకల ద్వారా వ్యాపించే పర్యావరణ సంబంధిత ఇన్ఫెక్షన్ అని, ప్రజలు అప్రమత్తంగా ఉండాలి, కానీ భయపడాల్సిన అవసరం లేదని డాక్టర్లు వెల్లడించారు.