ఈ ఏడాది 3,600 మందికి పైగా యాత్రికుల రాకపోకలకు సన్నాహాలు

దుబాయ్, మే 21: ఈ ఏడాది హజ్ యాత్ర సందర్భంగా 3,600 మందికి పైగా యాత్రికులకు సేవలు అందించేందుకు దుబాయ్ ఎయిర్‌పోర్ట్స్ విస్తృత ఏర్పాట్లు చేసింది. యూఏఈ నుంచి హజ్‌కు వెళ్లే యాత్రికుల్లో దాదాపు 59 శాతం మంది దుబాయ్ విమానాశ్రయాల ద్వారానే ప్రయాణించనున్నట్లు అధికారులు వెల్లడించారు.

హజ్ ప్రయాణాలకు సంబంధించిన విమాన సర్వీసులు మే 23 వరకు కొనసాగనున్నాయి. ఎమిరేట్స్, సౌదియా, ఫ్లైదుబాయ్, ఫ్లైనాస్ సంస్థలు ప్రత్యేక హజ్ విమానాలను నడుపుతున్నాయి. ఇదిలా ఉండగా, అధికారిక దుబాయ్ ప్రభుత్వ ప్రతినిధి బృందం మే 21న హజ్ యాత్రకు బయలుదేరింది.

యాత్రికుల రాకపోకలు సజావుగా సాగేందుకు దుబాయ్ ఎయిర్‌పోర్ట్స్ ప్రత్యేక కార్యాచరణ ప్రణాళికను సిద్ధం చేసింది. ఈ ఏర్పాట్లలో దుబాయ్ పోలీస్, జీడీఆర్‌ఎఫ్‌ఏ, దుబాయ్ కస్టమ్స్, దుబాయ్ అంబులెన్స్ సర్వీసెస్, డ్నాటా, దుబాయ్ డ్యూటీ ఫ్రీ, డీసీఏఏ, ఆర్‌టీఏ, డీహెచ్‌ఏ వంటి పలు ప్రభుత్వ, ప్రైవేట్ సంస్థలు భాగస్వామ్యం అయ్యాయి.

యాత్రికుల కోసం ప్రత్యేక చెక్-ఇన్ కౌంటర్లు, సమీప గేట్లు, ఉచిత గిఫ్ట్ ప్యాక్‌లు, బహుభాషా సహాయక సిబ్బంది, ప్రార్థనా గదులు, ఇహ్రామ్ మార్చుకునే ప్రత్యేక సదుపాయాలు ఏర్పాటు చేశారు. వృద్ధులు, ప్రత్యేక సహాయం అవసరమైన వారికి వీల్‌చైర్లు, వైద్య పరీక్షలు, గ్రౌండ్ అసిస్టెన్స్ బృందాలను అందుబాటులో ఉంచారు.

దుబాయ్ కార్పొరేషన్ ఫర్ అంబులెన్స్ సర్వీసెస్ కూడా విమానాశ్రయాల్లో వైద్య సేవలను విస్తరించి, అవసరమైన సమయంలో తక్షణ సహాయం అందించేందుకు చర్యలు చేపట్టింది.

హజ్ యాత్రికులు విమానం బయలుదేరే సమయానికి కనీసం నాలుగు గంటల ముందే విమానాశ్రయానికి చేరుకోవాలని అధికారులు సూచించారు. హజ్ అనుమతిపత్రాలు, వ్యాక్సినేషన్ సర్టిఫికెట్లు సహా అన్ని అవసరమైన పత్రాలను వెంట తీసుకురావాలని తెలిపారు.

హజ్ యాత్ర ముగించుకుని యాత్రికులు మే 30 నుంచి జూన్ 2 మధ్య తిరిగి వచ్చే అవకాశం ఉంది. వారి రాక కోసం కూడా ప్రత్యేక ఏర్పాట్లు చేసినట్లు అధికారులు వెల్లడించారు. ముఖ్యంగా జమ్‌జమ్ నీటి కోసం ప్రత్యేక బ్యాగేజ్ బెల్ట్‌లు ఏర్పాటు చేయనున్నట్లు తెలిపారు.