యూఏఈ: ప్రమాదకరమైన స్టంట్ డ్రైవింగ్ చేస్తూ హల్చల్ చేసిన వ్యక్తికి దుబాయ్ పోలీసులు షాకిచ్చారు. ట్రాఫిక్ పెట్రోలింగ్ బృందాలు ఇటీవల ఉద్దేశపూర్వకంగా వాహనం శబ్దాన్ని పెంచడంతో సహా నిర్లక్ష్యంగా మరియు ప్రమాదకరమైన స్టంట్ డ్రైవింగ్‌లో పాల్గొన్నందుకు ఒక కారును స్వాధీనం చేసుకున్నారు. డ్రైవర్ పై చట్టపరమైన చర్యలు తీసుకున్నట్లు  దుబాయ్ పోలీసుల జనరల్ డిపార్ట్‌మెంట్ ఆఫ్ ట్రాఫిక్ డిప్యూటీ డైరెక్టర్ బ్రిగేడియర్ ఎస్సామ్ ఇబ్రహీం అల్ అవార్ తెలిపారు.  వాహనాలతో స్టంట్స్ చేయడం కేవలం ట్రాఫిక్ ఉల్లంఘన మాత్రమే కాదని, ఇది సమాజ మరియు నివాస ప్రాంతాలను ప్రభావితం చేసే ఒక ప్రతికూల ప్రవర్తన అని హెచ్చరించారు.

ఇలాంటి  ప్రమాదకర ప్రవర్తన డ్రైవర్ ప్రాణానికే కాకుండా ఇతరుల ప్రాణాలకు, భద్రతకు, మరియు రక్షణకు ప్రమాదం కలిగిస్తుందన్నారు. ఇలాంటి డ్రైవింగ్ ధోరణలు నివాసితులకు ఇబ్బంది కలిగిస్తుందని, ఇతర వాహనదారులలో భయం, ఆందోళనను సృష్టిస్తుందన్నారు.  

ట్రాఫిక్ భద్రత మరియు ప్రజాశాంతిపై ప్రతికూల ప్రభావం చూపే ఇటువంటి ప్రవర్తనలు తీవ్రమైన ఉల్లంఘనలని, దుబాయ్ పోలీసులు వీటిని కఠినంగా పరిగణిస్తారని ఆయన స్పష్టం చేశారు. రహదారిని దుర్వినియోగం చేస్తే కఠినమైన చట్టపరమైన చర్యలు తీసుకోవలసి వస్తుందని ఆయన తెలిపారు.  వాహనాలను జప్తు చేయడంతో పాటు, తీవ్రమైన ఉల్లంఘనలకు పాల్పడిన డ్రైవర్ల వాహనాలను విడుదల చేయడానికి Dh50,000 వరకు జరిమానా విధించే అవకాశం ఉందని ఆయన హెచ్చరించారు.