న్యూ ఢిల్లీ: సుప్రీమ్ కోర్టు మాజీ జడ్జి, తెలుగువారైన జస్టిస్ లావు నాగేశ్వరరావుకు అరుదైన అంతర్జాతీయ గౌరవం లభించింది. లండన్‌లోని ప్రతిష్టాత్మక 'ఆనరబుల్ సొసైటీ ఆఫ్ ది ఇన్నర్ టెంపుల్' (The Inner Temple) గౌరవ బెంచర్ (Honorary Bencher) గా ఎన్నికయ్యారు. ఇంగ్లాండ్ మరియు వేల్స్‌లో బారిస్టర్లకు శిక్షణ మరియు నియంత్రణను పర్యవేక్షించే నాలుగు చారిత్రక సంస్థలలో ఇన్నర్ టెంపుల్ ఒకటి.

• జస్టిస్ ఎల్.నాగేశ్వరరావు స్వగ్రామం గుంటూరు జిల్లాలోని పెదనందిపాడు.
• న్యాయవాదిగా అద్భుతమైన కెరీర్ సాధించిన ఆయన, హైకోర్టు న్యాయమూర్తిగా పనిచేయకుండా నేరుగా 'బార్' (Bar) నుండి సుప్రీంకోర్టు న్యాయమూర్తిగా పదోన్నతి పొందిన భారతదేశపు ఏడవ న్యాయవాదిగా రికార్డు సృష్టించారు.
• ఆయన గతంలో భారత అదనపు సొలిసిటర్ జనరల్ (Additional Solicitor General of India) గా రెండుసార్లు సేవలు అందించారు. జూన్ 2022లో సుప్రీంకోర్టు న్యాయమూర్తిగా పదవీ విరమణ పొందారు.
• చారిత్రాత్మక తీర్పులు: సుప్రీంకోర్టులో ఉన్న కాలంలో రాజ్యాంగ చట్టాలు, పౌర హక్కులు, మత స్వేచ్ఛ మరియు కోవిడ్-19 మహమ్మారి సమయంలో సంక్షేమ చర్యలకు సంబంధించిన అనేక మైలురాయి లాంటి తీర్పులలో ఆయన భాగస్వామిగా ఉన్నారు.

న్యాయ రంగానికి మరియు ప్రజాసేవకు ఆయన చేసిన విశిష్ట సహకారానికి గుర్తింపుగా లండన్ లీగల్ ఇన్స్టిట్యూషన్ ఈ గౌరవాన్ని ప్రకటించింది. ప్రస్తుతం ఆయన లండన్‌లోని '39 ఎసెక్స్ ఛాంబర్స్' లో డోర్ టెనెంట్‌గా అనుబంధాన్ని కలిగి ఉన్నారు.

 --బాజీ షేక్(యూఏఈ)