దోహా: ఖతార్ లో ప్రైవేట్ రంగ ఉద్యోగులకు పూర్తి వేతనంతో కూడిన మూడు రోజులపాటు ఈద్ అల్-అధా సెలవులను కార్మిక మంత్రిత్వ శాఖ ప్రకటించింది.ఈ సెలవు దినాల్లో పని చేయాల్సి వస్తే, కార్మిక చట్టంలోని ఆర్టికల్ 74లో నిర్దేశించిన ఓవర్‌టైమ్ మరియు అలవెన్సులకు సంబంధించిన నిబంధనలను తప్పక పాటించాలని మంత్రిత్వ శాఖ పేర్కొంది. ఈ సందర్భంగా ఉద్యోగులకు మరియు యజమానులకు మంత్రిత్వ శాఖ తన శుభాకాంక్షలను తెలియజేసింది. ఇదే సమయంలో, వివిధ మంత్రిత్వ శాఖలు, ప్రభుత్వ సంస్థలు మరియు ప్రభుత్వ రంగ సంస్థలకు మే 26 నుండి మే 30 వరకు సెలవులు ఉంటాయని 'అమీరి దివాన్' ప్రకటించింది.

ఈద్ అల్-అధా..  పబ్లిక్ ప్రాసిక్యూషన్ పని వేళలు
ఈద్ అల్-అధా సెలవుల సమయంలో తమ పని వేళలను పబ్లిక్ ప్రాసిక్యూషన్ ప్రకటించింది. ఈ సెలవుల సమయంలో, పబ్లిక్ సర్వీస్‌తో సహా పబ్లిక్ ప్రాసిక్యూషన్‌కు చెందిన పలు సేవా కేంద్రాలు, అలాగే రెసిడెన్స్ అఫైర్స్ ప్రాసిక్యూషన్  సాయంత్రం 6 గంటల నుండి రాత్రి 10 గంటల వరకు పనిచేయనున్నాయి.

హమద్ అంతర్జాతీయ విమానాశ్రయంలోని 'తీర్పుల అమలు కార్యాలయం' (Judgment Enforcement Office) సెలవుల సమయంలో కూడా 24 గంటలూ నిరంతరాయంగా తన సేవలను కొనసాగిస్తుంది. ఎలక్ట్రానిక్ సేవలు  eservices.pp.gov.qa వెబ్‌సైట్‌లో అందుబాటులో ఉంటాయని, సెలవుల సమయంలో ప్రజలు ముఖ్యమైన సేవలను పొందేందుకు వీటిని వినియోగించుకోవచ్చని తెలిపారు.