మనామాః ఇరాన్ రివల్యూషనరీ గార్డ్‌తో సంబంధం ఉన్న ఉగ్రవాద సంబంధిత కార్యకలాపాలు మరియు గూఢచర్యానికి సంబంధించిన రెండు వేర్వేరు కేసులలో దోషులుగా నిర్ధారించిన తొమ్మిది మంది నిందితులకు బహ్రెయిన్ హై క్రిమినల్ కోర్టు యావజ్జీవ కారాగార శిక్ష, మరో ఇద్దరికి మూడేళ్ల జైలు శిక్ష విధించింది. బహ్రెయిన్ కు వ్యతిరేకంగా  ఉగ్రవాద చర్యలు చేపట్టడం,  జాతీయ ప్రయోజనాలకు హాని కలిగించడం అనే ఉద్దేశ్యంతో ఇరాన్ రివల్యూషనరీ గార్డ్‌తో సహకరించారని నిందితులపై కేసులు నమోదు చేశారు.
నిందితులు నిఘా కార్యకలాపాలు నిర్వహిస్తున్నప్పుడు హోటల్ గదులు, అపార్ట్‌మెంట్లు అద్దెకు తీసుకుని, సేకరించిన సమాచారాన్ని విదేశాల్లో ఉన్న పరారీలో ఉన్న అనుమానితుడికి పంపించాడని అధికారులు తెలిపారు. మనీ ఎక్స్ఛేంజ్, ఆర్థిక బదిలీలు, క్రిప్టోకరెన్సీ లావాదేవీలలో పనిచేస్తున్న మరో నిందితుడి ప్రమేయం కూడా దర్యాప్తులో వెల్లడైంది. ఇతను ఇరాన్‌లో ఒక కార్యాలయాన్ని నిర్వహిస్తున్నట్లు సమాచారం. ఈ కార్యకలాపాలకు సంబంధించిన ఆర్థిక బదిలీలను సులభతరం చేయడానికి అతను బహ్రెయిన్, ఇరాన్ బ్యాంకు ఖాతాలను ఉపయోగించాడని, పరారీలో ఉన్న అనుమానితుడి నుండి ఇరాన్ టోమన్ నిధులను స్వీకరించి, వాటిని బహ్రెయిన్ దినార్లలోకి మార్చి ఈ పథకంలో పాల్గొన్న సభ్యులకు పంపిణీ చేశాడని ప్రాసిక్యూటర్లు పేర్కొన్నారు.