యూఏఈ: యూఏఈలో జూన్ నెలతో అనేక మార్పులు రానున్నాయి. వీటిలో కొన్ని మార్పులు నివాసితుల ఆర్థిక పరిస్థితులపై (జేబులపై) ప్రత్యక్ష ప్రభావాన్ని చూపనున్నాయి. ఫిబ్రవరి 28న అమెరికా-ఇరాన్ యుద్ధం ప్రారంభమైన తర్వాత, ప్రపంచవ్యాప్తంగా ఇంధనం మరియు నిత్యావసరాల ధరలు తీవ్ర ఒడిదుడుకులకు లోనయ్యాయి. యుద్ధానికి ముందు ప్రపంచ ఇంధన మరియు ద్రవీకృత సహజ వాయువు (LNG) రవాణాలో ఐదవ వంతుకు కేంద్రంగా ఉన్న 'హోర్ముజ్ జలసంధి' (Strait of Hormuz) వద్ద దిగ్బంధం ఏర్పడటంతో, వాణిజ్యం అధిక భాగం స్తంభించిపోయింది. దీంతో ఖర్చులు అధికం అయ్యాయి. యూఏఈలోని నివాసితులు తమ ఖర్చులను ఆదా చేసుకోవడానికి ప్రభుత్వం పలు చర్యలు చేపట్టినప్పటికీ, ఈ జూన్ నెలలో నివాసితులు  అదనంగా ఖర్చు చేయాల్సి వస్తోంది.
ఇంధన ధరలు
ఫిబ్రవరి 28న యుద్ధం ప్రారంభమైనప్పటి నుండి ఎమిరేట్స్‌లో ఇంధన ధరలు పెరుగుతూనే ఉన్నాయి.  
Super 98 పెట్రోల్ ధర లీటరుకు Dh3.66 నుంచి Dh3.95కి పెరిగింది. అలాగే, Special 95 పెట్రోల్ ధర Dh3.55 నుంచి Dh3.83కి, E-Plus 91 పెట్రోల్ ధర లీటరు Dh3.48 నుంచి Dh3.76కి, డీజిల్ ధర Dh4.33 నుంచి  Dh4.69కి పెరిగింది.  వాహన రకాన్ని బట్టి, మే నెలతో పోలిస్తే జూన్‌లో ఫుల్ ట్యాంక్ పెట్రోల్ నింపడానికి Dh14.28 నుండి Dh21.46 వరకు అదనంగా ఖర్చవుతుంది.
సాలిక్ టోల్స్ (వ్యాట్‌తో)
దుబాయ్‌లోని ఏకైక టోల్ గేట్ ఆపరేటర్ అయిన సాలిక్, జూన్ 1 నుండి టోల్ టారిఫ్‌లు మరియు ట్యాగ్ యాక్టివేషన్ ఫీజుపై ఐదు శాతం విలువ ఆధారిత పన్ను (వ్యాట్)ను అమలు చేయనున్నట్లు ప్రకటించింది. వ్యాట్‌కు ముందు రద్దీ సమయాల్లో (ఉదయం 6 నుండి 10 వరకు మరియు సాయంత్రం 4 నుండి 8 వరకు) ప్రతి ట్రిప్‌కు Dh6 గా నిర్ణయించగా, వ్యాట్ తర్వాత ప్రతి ట్రిప్‌కు Dh6.30కి పెంచారు. వ్యాట్‌కు ముందు రద్దీ లేని సమయాల్లో (ఉదయం 10 నుండి సాయంత్రం 4 వరకు మరియు రాత్రి 8 నుండి తెల్లవారుజాము 1 వరకు) ప్రతి ట్రిప్‌కు Dh4 గా ఉండగా, వ్యాట్ తర్వాత ప్రతి ట్రిప్‌కు Dh4.20ను వసూలు చేయనున్నారు. కాగా, తెల్లవారుజాము 1 గంట నుండి 6 గంటల మధ్య ఎటువంటి ఫీజులు వర్తించవు. రద్దీ సమయాల్లో  ప్రతి మార్గంలో రెండు సాలిక్ గేట్లను దాటితే, అది రోజుకు నాలుగు టోల్ క్రాసింగ్‌లకు సమానం అవుతది. సవరించిన రేటు ప్రకారం ప్రతి ట్రిప్‌కు Dh6.30 చొప్పున, 5 శాతం వ్యాట్ కలిపితే రోజువారీ టోల్ Dh25.20 అవుతుంది. సాధారణంగా 21 పనిదినాలు ఉండే నెలలో మొత్తం Dh529.20 అవుతుంది. అయితే, వ్యాట్‌కు ముందు ఉన్న ప్రతి ట్రిప్‌కు Dh6 రేటు ప్రకారం, ఇదే ప్రయాణానికి నెలకు Dh504 ఖర్చయ్యేది. అంటే, వ్యాట్‌ను ప్రవేశపెట్టడం వల్ల నెలవారీ ప్రయాణ ఖర్చు Dh25.20 పెరుగింది.  
దుబాయ్ పార్కింగ్ ఫీజులు (వ్యాట్‌తో సహా)
దుబాయ్‌లోని అతిపెద్ద పార్కింగ్ ఆపరేటర్ అయిన పార్కిన్, జూన్ 1 నుండి తమ ద్వారా అందించబడే అన్ని పార్కింగ్ సేవలపై 5 శాతం వ్యాట్‌ను విధిస్తున్నట్లు ప్రకటించింది. ఇందులో ఆన్-స్ట్రీట్ మరియు ఆఫ్-స్ట్రీట్ పార్కింగ్, సీజనల్ కార్డులు, పర్మిట్లు మరియు రిజర్వేషన్లు ఉన్నాయి. గత సంవత్సరం ఇదే కాలంతో పోలిస్తే దుబాయ్‌లో పెయిడ్ పార్కింగ్ సగటు గంట ఖర్చు 51 శాతం పెరిగింది. ఏప్రిల్‌లో వేరియబుల్ పార్కింగ్ టారిఫ్‌ను ప్రవేశపెట్టిన తర్వాత, వెయిటెడ్ యావరేజ్ అవర్లీ టారిఫ్ 2025 జూలై-సెప్టెంబర్‌లో గంటకు Dh2.01 నుండి Dh3.03కి పెరిగింది.
అజ్మాన్ టాక్సీ ఛార్జీలు
సాధారణంగా స్థిరమైన ధరలను కలిగి ఉండే అజ్మాన్‌లోని టాక్సీ ఛార్జీలు, ఇంధన ధరల పెరుగుదల వల్ల గత కొన్ని నెలలుగా పెరిగాయి. మే నెలలో కిలోమీటరుకు Dh1.95గా ఉన్న సుంకంతో పోలిస్తే, జూన్ నెలకు కిలోమీటరుకు Dh2 కొత్త సుంకం విధించడంతో ధరలు మరింత పెరగనున్నాయి.  
డెలివరీలు మరియు రవాణా సంబంధిత సేవలు
ఫిబ్రవరి 28న ప్రాంతీయ యుద్ధం ప్రారంభమైన తర్వాత, నిత్యావసర వస్తువుల ధరలు పెరగవని రిటైలర్లు నివాసితులకు హామీ ఇచ్చినప్పటికీ, రిటైల్ రంగం అంతటా రవాణా, లాజిస్టిక్స్ మరియు సరఫరా గొలుసు ఖర్చులపై ప్రభావం పడింది. నిత్యావసర వస్తువుల ధరలను యథాతథంగా ఉంచడానికి తాము కట్టుబడి ఉన్నామని, అయితే ఈ సవాలుతో కూడిన కాలాన్ని ఎదుర్కొంటున్నందున ఇతర నిత్యావసర వస్తువుల ధరలు ప్రభావితం కావచ్చని  నిపుణులు చెప్పారు. పెరుగుతున్న ధరలను ఎదుర్కోవడానికి, యూఏఈ ఆర్థిక మరియు పర్యాటక మంత్రిత్వ శాఖ 'ఎసెన్షియల్ గూడ్స్ ప్రైసెస్ ప్లాట్‌ఫామ్' అనే ఒక వేదికను ప్రారంభించింది. ఇది నిత్యావసర వస్తువుల కోసం వెతకడం ద్వారా మరియు వివిధ రిటైలర్ల వద్ద వాటి ధరలను పోల్చడం ద్వారా కొనుగోలుదారులు తమ కిరాణా బిల్లులపై ఆదా చేసుకోవడానికి సహాయపడుతుంది. వీటిలో బియ్యం, వంట నూనె, గుడ్లు, బ్రెడ్, చికెన్, మాంసం, చేపలు, పాలు, కూరగాయలు, పండ్లు మరియు నీరు వంటి ప్రాథమిక వస్తువులు ఉన్నాయి.
బంగారం ధరలు
వరల్డ్ గోల్డ్ కౌన్సిల్ ప్రకారం, ప్రస్తుత ప్రపంచ అంచనాలు మరియు ఇటీవలి మార్కెట్ పోకడల ఆధారంగా జూన్ 2026లో యూఏఈలో బంగారం ధరలు అస్థిరంగా ఉన్నప్పటికీ  బలంగా ఉండే అవకాశం ఉంది. ప్రపంచ బంగారం ధరలు, యూఎస్ వడ్డీ రేట్లు, ద్రవ్యోల్బణం మరియు భౌగోళిక రాజకీయ ప్రమాదాల కారణంగా తరచూ బంగారం ధరల్లో మార్పులు వస్తుంటాయి.